ریاست بہار کے دارالحکومت پٹنہ میں واقع ضلعی اقلیتی بہبود کے دفتر میں وزیر اعلی اقلیتی روزگار لون منصوبہ کے تحت لون حاصل کرنے والے درخواست دہندگان کا آج سے انتخاب کا عمل شروع ہو رہا ہے، ضلع دفتر کی جانب سے موصولہ اطلاعات کے مطابق کورونا گائڈلائن کو ملحوظ رکھتے ہوئے یومیہ 100 افراد کو بلایا جا رہا ہے۔
سال 2019-20 کے لیے جن امیدواروں نے اقلیتی روزگار لون حاصل کرنے کے لیے درخواستیں دی تھیں ان کے انتخاب کا عمل آج سے شروع ہو کر آئندہ برس چھ جنوری تک جاری رہے گا۔
پٹنہ کے ضلعی اقلیتی بہبود کے دفتر میں روزانہ 100 لوگوں کو دو شفٹ میں بلایا گیا ہے، کورونا گائڈ لائن پر عمل کرتے ہوئے انٹرویو کا اہتمام کیا گیا ہے۔
ضلع اقلیتی بہبود افسر اودھیش کمار نے بتایا کہ 1297 درخواست دہندگان کو تمام ضروری کاغذات کے ساتھ طلب کیا گیا ہے، ان کے کاغذات کی تحقیقات کے بعد منتخب ہونے والے امیدواروں کی فہرست اقلیتی مالیاتی کارپوریشن کو بھیج دی جائے گی۔
جس کے بعد وہ وہاں سے ان لوگوں کے اکاؤنٹ میں ان کی مطلوبہ لون کی رقم بھیج دی جائے گی، اس منصوبے کے تحت 50 ہزار سے 5لاکھ تک کا لون پانچ فیصد کی شرح پر پانچ برسوں کے لیے دستیاب کرایا جائے گا۔
انہوں نے کہا کہ اس بار کرونا گائڈ لائن پر عمل کرتے ہوئے روزانہ 100 لوگوں کو دو شفٹ میں بلایا گیا ہے. پٹنہ ضلع کے لئے اس مالی سال کے لئے 2.56 کروڑ مختص کئے گئے ہیں. ہم لوگوں کی کوشش ہو گی کہ زیادہ سے زیادہ مستحقین کو اس کا فائدہ ملے. اس میں عورتوں معذوروں کو ترجیح دی جاتی ہے
