ریاست بہار اسمبلی کے ضمنی انتخاب میں کشن گنج حلقے سے ایم آئی ایم کے اقتدار میں آنے کہ بعد بی جے پی کے مرکزی وزیر گری راج سنگھ نے اپنے بیان میں کہا تھا کہ یہ بہار کے مستقبل کے لئے خطرناک ہے۔
جس کے بعد جے ڈی یو کے ترجمان اروند نشاد نے کہا کہ گری راج سنگھ پہلے بھی اس قسم کی زبان استعمال کرتے رہے ہیں یہ کوئی نئی بات نہیں ہے، لیکن انہیں معلوم ہونا چاہئے کہ یہاں گنگا جمنا تہذیب ہے اور بہار ہمیشہ دھمکیوں سے نمٹنے کے لئے تیار رہتا ہے۔
اسی کے ساتھ ہی اپوزیشن پارٹی آر جے ڈی کے رکن اسمبلی بھائی ویرندر نے کہا کہ 'گری راج سنگھ ہمیشہ آگ لگانے والی زبان استعمال کرتے اور ہنگامہ پھیلانے والے بیانات دیتے رہتے ہیں، لہذا آر جے ڈی ان کے بیانات یا ٹویٹس کو توجہ نہیں دیتی ہے'۔
واضح رہے کہ اویسی کی پارٹی کے امیدوار قمر الہدی کی کشن گنج اسمبلی سیٹ پرجیت درج کرنے کے بعد گری راج سنگھ نے ٹویٹ کرتے ہوئے کہا کہ یہ بہار کی ہم آہنگی کے لئے خطرناک ہے۔
گری راج سنگھ نے یہ بھی کہا کہ 'اویسی جناح کی سوچ رکھتے ہیں اب بہار کے عوام کو اپنے مستقبل کے بارے میں سوچنا چاہئے'۔
