ریاست بہار کے ضلع گیا میں کورونا وائرس کے مشتبہ مریضوں کی تعداد میں مسلسل اضافہ ہورہا ہے۔ 24 گھنٹے کے اندر کورونا وائرس کے پانچ مشتبہ مریضوں کو گیا کے انوگرہ نارائن مگدھ میڈیکل کالج وہسپتال کے آئیسولیشن وارڈ میں منتقل کرایا گیا ہے ۔
اطلاع کے مطابق گیا کے مانپور کا رہنے والا شخص جو نیپال میں کام کرتا تھا، اسے کئی دنوں سے تیز بخار اور سردی کی شکایت تھی، جس کے بعد اس نے خود کو مقامی ڈاکٹر کو دکھایا، کئی روز تک زیر علاج رہنے کے بعد جب اس کی صحت بہتر نہیں ہوئی تو ڈاکٹر نے اسے مگدھ میڈیکل وہسپتال کے آئیسولیشن وارڈ میں منتقل کر دیا ۔
وہیں دوسرا مشتبہ مریض بنگلہ دیش کا رہائشی ہے، جو گزشتہ روز راجدھانی ایکسپریس کے ذریعے دہلی سے سیالدہ جا رہا تھا، تبھی اس کی کھانسی اور بخار کی وجہ سے ریل میں موجود ٹی ٹی کو اس پرشک ہوا، جس کے بعد ٹی ٹی نے اس کو جنکشن پر اتارا، جہاں سے محکمہ صحت کی ٹیم نے اسے مگدھ میڈیکل کالج ہسپتال کے آئیسولیشن وارڈ میں داخل کرا دیا۔
اس دوران تیسرے کورونا کے مشتبہ مریض کو اورنگ آباد کے رفیع گنج سے لاکر داخل کرایا گیا ہے۔ ان تینوں مریضوں کے ٹیسٹ کے نمونے پٹنہ بھیجے گئے ہیں۔ واضح ہوکہ ابھی تک ضلع گیا کے آئیسولیشن وارڈ میں کوروناوائرس کے 14 مشتبہ مریضوں کو داخل کیا گیا ہے ۔
جس میں 9 مشتبہ مریضوں کی تفتیشی رپورٹ منفی پائی گئی ہے ، جبکہ کورونا کے پانچ مشتبہ مریضوں کی تحقیقاتی رپورٹ ابھی آنا باقی ہے۔
