بہار کے نائب وزیرعلیٰ سشیل کمار مودی نے وزیراعظم اور وزیراعلیٰ دیہی سڑک منصوبوں کے رکھ رکھاﺅ کےلیےمرکزی حکومت سے اضافی رقم کا مطالبہ کیا ہے۔
مودی نے ریاست میں 15 ہزار کروڑ سے زیادہ کی لاگت سے دیہی سڑکوں کے سنگ بنیاد، افتتاح کے موقع پر منعقدہ ورچوئل تقریب کو خطاب کرتے ہوئے کہاکہ ملک میں پہلی مرتبہ وزیراعظم اٹل بہار ی واجپئی نے دیہی سڑکوں کی تعمیر کیلئے ” وزیراعظم دیہی سڑک منصوبہ “ شروع کیا تھا۔
بہار میں اب تک دیہی سڑکوں کی تعمیر پر 64,199.20 کروڑ خرچ کئے جاچکے ہیں۔ گزشتہ پانچ سالوں میں دیہی سڑکوں کے رکھ رکھاﺅ پر 4,668 کروڑ روپے خرچ کئے گئے ہیں۔آنے والے سالوں میں یہ خرچ مزید بڑھے گا۔ اس لئے 15 ویں مالیاتی کمیشن کو میمورنڈم دے کر وزیراعلیٰ اور وزیراعظم دیہی سڑک منصوبوں کے تحت تعمیر سڑکوں کے رکھ رکھاﺅ کےلیے اضافی رقم کا مطالبہ کیا گیا ہے۔
نائب وزیراعلیٰ نے کہاکہ گاﺅں ۔ گاﺅں سڑک ، بجلی اور پانی پہنچ جانے کی وجہ سے اب گاﺅں اور شہروں کے درمیان کا فرق ختم ہو گیا ہے۔ گاﺅں اور ٹولوں کو بارہ مہینے سنگل رابطہ سڑک سے جوڑنے اور نالی ۔ گلی پختہ کاری منصوبہ آخری مرحلے میں ہے ۔ انہوں نے کہاکہ پانچ کیلومیٹر تک کی دیہی سڑکوں کے کنارے منریگا اور اس سے زائد طویل سڑکوں کے کنارے محکمہ جنگلات کی جانب سے شجرکاری کی جائے گی ۔
مودی نے کہاکہ 2012-13 سے لیکر 2019-20 تک سڑکوں کے کنارے 4 کروڑ 70 لاکھ پودے لگائے جاچکے ہیں۔اور آئندہ سے سڑک تعمیر اور رورل ورکس محکمہ کے بجٹ میں ہی شجرکاری کا نظم کیاجائے گا۔ انہوں نے کہاکہ حکومت فیصلہ لے چکی ہے کہ سڑکوں کی تعمیر کےلیے درختوں کو نہیں کاٹا جائےگا۔ اگر ضرورت پڑی تو درختوں کو منتقل کیاجائے گا۔
