آنند وہار ، سیالدہ ایکسپریس کی بوگی کاٹ کر چوروں نے اس واقعے کوانجام دیا تھا۔ یہ تمام سامان بی ایس ایف کو سپلائی کے لیے جارہے تھے تاہم پولیس نے اس معاملے میں پانچ افراد کی گرفتاری عمل میں لائی ہے۔
گیا ریلوے پولیس نے بڑی کامیابی حاصل کرتے ہوئے بین ریاستی گروہ کے پانچ افراد کو گرفتار کیا ہے۔ ریلوے پولیس فورس (آرپی ایف) نے آنند وہار اور سیالدہ ایکسپریس سے گزشتہ تیس ستمبر کو چوری ہوئے قریب ساڑھے چودہ لاکھ روپئے کے سامانوں کو بہار کے اورنگ آباد ضلع اور گیا ضلع سے برآمد کیا ہے۔
یہ سامان کولکاتا سے بی ایس ایف کو سپلائی کے لیے جارہے تھے۔تبھی گیا اسٹیشن کے قریب ٹرین کے ایس ایل آر بوگی کو کاٹ کر سامانوں کی چوری کی گئی تھی۔برآمد شدہ سامانوں میں 43 مانیٹر، گیارہ اسکینر سمیت کئی الیکٹرانک سامان شامل ہیں۔
مغل سرائے ڈیویزن کے آرپی ایف کے سنیئر کمانڈنٹ آشیش مشرا نے پریس کانفرنس میں بتایا کہ 30 ستمبر کو چوری ہونے کے بعد مغل سرائے ڈیویزن، داناپور ڈیویزن، دھنباد ڈیویزن سمیت کولکاتا کی آرپی ایف، سی آئی بی کی ٹیم کو تفتیش کے لیے لگایا گیا تھا۔
ٹیم کے ذریعے گیا اور اورنگ آباد ضلع کے کئی علاقوں میں چھاپے ماری کی گئی تھی۔ پولیس کی ٹیم صارف بنکر سامانوں کی خریداری کے لیے اورنگ آباد پہنچی جہاں ایک ہوٹل میں چوروں کا یہ گروہ تمام مسروقہ مال کے ساتھ ٹھہرا ہوا تھا۔
پولیس نے اسی ہوٹل سے پانچ ملزموں کو گرفتار کیا ہے جس میں سے دو ملزم گیا کے رہنے والے ہیں اور بقیہ تین اورنگ آباد کے رہنے والے ہیں۔
انہوں نے بتایا کہ تاہم اس گروہ کاسرغنہ سمیت دیگر آٹھ ملزم اب بھی فرار ہیں اور ان کی گرفتاری کے لیے چھاپے ماری کی کارروائی کی جارہی ہے۔ یہ سبھی بین ریاستی گروہ کے ارکان ہیں اور اس سے قبل بھی ان کے ذریعے متعدد وارداتیں انجام دی گئی ہیں۔
