ریاست بہار کے ضلع گیا کے لوٹوا کے جنگلات میں پولیس اور نکسلیوں کے درمیان گھنٹوں تصادم جاری رہا، اور دونوں اطراف سے کئی راؤنڈ گولیاں چلائی گئیں۔
اس مقابلے میں دونوں طرف گولیوں کا تبادلہ ہوا لیکن نکسلی جنگل کا فائدہ اٹھاتے ہوئے بھاگنے میں کامیاب ہوگئے، اور نکسلیوں کے ہاتھوں چھوڑی گئی بہت سی اشیاء کو پولیس نے ضبط کرلیا۔
اس سلسلے میں گیا کے سپرنٹنڈنٹ پولیس راجیو کمار مشرا نے بتایا کہ لوٹوا کے جنگلوں میں سی آر پی ایف اور پولیس کے ذریعہ سرچ آپریشن چلایا جارہا تھا، اس دوران پولیس کو دیکھ کر نکسلیوں نے فائرنگ شروع کردی۔
انہوں نے بتایا کہ پولیس نے بھی جوابی کارروائی کی اور متعدد راؤنڈ فائر کیے، جس کے بعد دونوں اطراف سے گھنٹوں تک گولیاں چلائی گئی، لیکن نکسل جنگل کا فائدہ اٹھاکر موقع سے فرار ہوگئے۔
ایس ایس پی نے مزید بتایا کہ جائے واردات سے پولیس نے نو موبائل، ایک واکی ٹاکی، ایک ریڈیو اور کھانے کی اشیاء برآمد کی ہیں۔
انہوں نے بتایا کہ اس کے علاوہ اے کے 47، ایس ایل آر، اناساس رائفل کی گولیوں کے متعدد کھوکھے بھی برآمد ہوئے ہیں۔
خیال رہے کہ ایس ایس پی راجیو مشرا نے بتایا کہ پولیس نکسلیوں کی تلاش میں سرگرم ہے۔
