گیا: بہار کا عظیم تہوار چھٹھ پوجا آج صبح کی پوجا کے ساتھ ختم ہوگیا ہے۔ ضلع گیا میں اس تہوار کو پرامن ماحول میں اختتام کرانے کی غرض سے ضلع انتظامیہ کے ساتھ سماجی کارکن بھی پیش پیش رہے۔ ضلع کے مسلم اکثریتی آبادی والے علاقے میں مسلمانوں کی جانب سے اس تہوار کے موقع پر خدمات انجام دی گئی ہیں۔
چھٹ گھاٹوں کی صفائی ستھرائی کے ساتھ لائٹنگ اور دیگر انتظامات کیے گئے تھے۔ کئی جگہوں پر علاقے کی معزز شخصیات خود گھاٹوں پر موجود رہ کر سارے انتظامات کی نگرانی کررہے تھے۔ چونکہ اس تہوار میں خواتین کی بڑی تعداد گھاٹوں پر پہنچ کر ڈوبتے سورج اور نکلتے ہوئے سورج کی پوجا کرتی ہیں اور یہ سارا عمل پانی کے ذریعے ہوتا ہے، اس لئے خواتین کے لیے گھاٹوں پر کپڑے تبدیل کرنے کے لیے عارضی چینجنگ روم بھی بنوائے گئے تھے۔
وہیں اطلاع کے مطابق ضلع گیا میں سبھی مقامات پر پرامن ماحول میں یہ تہوار ختم ہوا ہے، کہیں سے نا خشگوار واقعہ کی اطلاع نہیں ہے، ہر جگہ پر پولیس کی موجودگی تھی خاص کر ضلع کے ان گھاٹوں پر پولیس اور انتظامیہ کی نگاہ اور تعیناتی تھی جہاں پر چھٹ کرنے والوں کا ہجوم بڑا تھا۔ وہاں گھاٹوں پر پانی کی گہرائی ہونے کی وجہ سے ایس ڈی آر ایف کو بھی تعینات کیا گیا تھا۔ ضلع میں خود ڈی ایم اور ایس ایس پی گھاٹوں پر گشت کرتے نظر آئے۔
- مسلمانوں کی خدمات
چھٹ ایک ایسا تہوار ہے جسے بڑی پاکیزگی کے ساتھ منایا جاتا ہے ، تہوار میں مسلمانوں کی جانب سے ہندووں کی عقیدت کا بڑا خیال رکھا جاتا ہے۔ ضلع کے ہر علاقے میں مسلمانوں کی جانب سے خدمات انجام دی جاتی ہیں۔ گیا شہر میں بھی اس طرح کی بھائی چارگی دیکھنے کو ملی، وارڈ اکیس میں نیر احمد کی طرف سے صفائی کے ساتھ پرساد ' تبرک ' کے تقسیم کے لیے خصوصی اسٹال لگایا گیا تھا۔
مزید پڑھیں: بہار کا بڑا تہوار چھٹھ پوجا کا اختتام
چونکہ اس تہوار میں ایک خاص بات یہ ہے کہ بلا تفریق لوگ چھٹ پوجا کے موقع پر چھٹ ورتیوں کی ٹوکری جسے چھٹ کرنے والے اپنے سروں پر رکھ کر گھاٹ لے کر جاتے ہیں اس میں وہ پرساد ڈالتے ہیں تاکہ اُن کی بھی حاضری شامل ہوجائے، چھٹ تہوار میں مسلمانوں کی خدمات کی سراہنا بھی ہوتی ہے۔
