بہار کے ضلع بودھ گیا میں ہر برس بدھ جینتی کے موقع پر ایک شاندار عوامی تقریب منعقد کی جاتی تھی جس میں دنیا بھر سے لاکھوں کی تعداد میں عقیدت مند شامل ہوا کرتے تھے تاہم رواں برس کورونا وبأ کے سبب بین الاقوامی سیاحتی مقام بودھ گیا سنسان ہے۔
مہابودھی مندر میں چند بدھ بھکشوؤں کی جانب سے گوتم بدھ کی 2564 جینتی کی تقریب منائی گئی ہے اور یہاں ہر برس کی طرح آج شام کو بھی دیے روشن کیے جائیں گے۔
خیال رہے کہ سات مئی کو بودھیسٹ مذہب کے پیشوا گوتم بدھ کی پیدائش ہوئی تھی۔ بدھ مذہب کے ماننے والوں کے مطابق اسی تاریخ کو بودھ گیا میں پیپل کے درخت کے نیچے گوتم بدھ کو روحانی علم حاصل ہوا اور اسی دن ان کی موت بھی ہوئی تھی۔
لہذا بدھ مت کے پیروکار بدھ جینتی کو تریویدی 'تہری' جینتی کے طور پر مناتے ہیں کیونکہ مہاتما گوتم بدھ کی زندگی کے تینوں واقعات اسی تاریخ کو پیش آئے تھے۔
ہر سال بودھ گیا میں بدھ جینتی کے موقع پر ایک بین الاقوامی پیس مارچ کا انعقاد کیا جاتا رہا ہے، جس میں دنیا بھر کے بودھ مذہبی رہنما، دلائی لامہ، دنیا کے متعدد ممالک کے عقیدت مند اور سیاح شامل ہوتے ہیں۔
لیکن اس بار لاک ڈاؤن کی وجہ سے بودھ گیا میں سڑکیں ویران پڑی ہے۔ اس بار بدھ جینتی کے موقع پر کوئی عوامی پروگرام منعقد نہیں کیا گیا ہے۔
اس سلسلے میں بودھ بھکشو نے کہا کہ مہابودھی مندر کی دیکھ بھال کرنے والے چند دس پندرہ عقیدت مندوں نے ہی مندر کے احاطے میں بدھ جینتی منائی ہے اور خصوصی پوجا کا اہتمام کیا گیا ہے جس میں پوری دنیا کی کورونا سے حفاظت کی دعا کی گئی ہے۔
مندر انتظامیہ کمیٹی کے سکریٹری این دور جے نے کہا کہ اس بار عوامی تقریب منعقد نہیں ہوئی، صبح میں مہابودھی مندر میں خصوصی پوجا کی گئی جس میں چند بودھ بھکشو سوشل ڈسٹنس کا خیال رکھتے ہوئے شامل ہوئے، مہابودھی مندر میں بدھ مت کے صرف چند پیروکار ان پروگراموں میں حصہ لیں گے۔
