بہار میں اقلیتی بہبود کے وزیر محمد زما خان آج اپنے ذاتی مذہبی یک روزہ دورے پر اجمیر شریف درگاہ پہنچے ہیں، جہاں انہوں نے عالمی مشہور اولیا حضرت خواجہ غریب نواز رحمتہ اللہ علیہ کی بارگاہ میں حاضری دی اور بہار کی ترقی و خوشحالی کے لیے دعا مانگی۔
اطلاعات کے مطابق بہار حکومت میں وزیر بننے والے مسلم رہنما محمد زما خان بہوجن سماجوادی پارٹی کی نشان پر بہار کے چین پور اسمبلی سیٹ سے تقریبا ایک لاکھ ووٹوں سے کامیابی حاصل کی تھی، بعد ازیں انہوں نے جنتا دل یونائیٹڈ میں اپنی شمولیت اختیار کرلی۔ صوفی حضرت خواجہ معین الدین چشتی رحمۃ اللہ علیہ کی بارگاہ میں اسی کامیابی کا شکرانہ ادا کرنے لیے آج وہ اجمیر پہنچے ہیں۔
اس دوران انہوں نے خواجہ غریب نواز کی مزار اقدس پر حاضری دی اور اپنی صحت، تندرستی اور سلامتی کی دعا مانگی، زما خان نے خصوصی گفتگو میں بتایا کہ خواجہ صاحب کی دعاؤں کے صدقے میں بہار کے اقلیتی بہبود کے وزیر کا ذمہ ملا ہے۔ اس لیے وہاں کی عوام کے لیے ہر ممکن ترقیاتی اور فلاحی کام کو انجام دیا جائے گا۔
مزید پڑھیں:
زما خان کے مطابق وزیراعلی نتیش کمار نے مسلم اور دلتوں کے لیے کئی فلاحی کام کیے ہیں۔ بہار میں مسلم قوم کے لئے خصوصی تعلیم و تربیت اور ترقیاتی کاموں کو عملی جامہ پہنایا ہے۔
زما خان نے وزیر اعلی کی صحت یابی کی بھی دعا ماں گی، زما خان کو خواجہ صاحب کے دربار میں زیارت سید انور سعادت فریدی نے کرائی اور دستار بندی کرکے دربار کا تبرک پیش کیا۔
