ریاست بہار کے وزیر اعلی نتیش کمار کی صدارت میں منعقد ہوئی کابینہ کی میٹنگ میں حکومت نے دربھنگہ کے کیوٹی بلاک میں منعقد بی بی کنیز فاطمہ وقف اسٹیٹ نمبر 485 پر اقلیتی رہائشی اسکول تعمیر کرنے کی منظوری دی ہے۔
کابینہ میٹنگ میں 12 ایجنڈوں کو منظوری دی گئی ہے۔ محکمہ کابینہ کے پرنسپل سکریٹری ڈاکٹر دیپک پرساد نے بتایا کہ 'کابینہ کی میٹنگ میں 12 فیصلے کیے گئے ہیں جن پر کابینہ نے اپنی مہر لگائی ہے۔'
اس میٹنگ میں محکمہ مالیات کے تین ایجنڈے شامل تھے۔ جبکہ محکمہ صحت سے بھی تین ایجنڈے شامل کیے گئے ہیں۔ محکمہ پنچایتی راج کے ایک ایجنڈے کو منظوری ملی ہے جبکہ محکمہ کابینہ سکریٹریٹ کے ایک ایجنڈے کو منظوری دی گئی ہے۔ محکمہ عمومی انتظامیہ کی جانب سے بھی ایک ایجنڈا پیش کیا گیا تھا جسے حکومت نے منظوری دے دی ہے۔
وہیں محکمہ اقلیتی فلاح کے ذریعہ پیش کیے گئے ایجنڈے کو حکومت نے منظوری دیتے ہوئے اقلیتی رہائشی اسکول تعمیر کرنے کا فیصلہ کیا ہے جس کے لیے پانچ برس کے رکھ رکھاؤ سمیت 56 کروڑ 99 لاکھ 38 ہزار کی منظوری حکومت نے دی ہے۔
محکمہ کابینہ کے پرنسپل سیکریٹری نے بتایا کہ اقلیتی رہائشی اسکول 560 بیڈ والا تعمیر کیا جائے گا۔ اس کے تحت تعلیمی عمارت کے علاوہ طلبا و طالبات کے لیے علیحدہ ہاسٹل کانفرنس ہال، ملازمین کی رہائش گاہ اور کھیل کا میدان بنایا جائے گا۔
کابینہ سیکریٹری نے بتایا کہ اقلیتی طبقہ کے طلبا وطالبات کی ہمہ جہت ترقی کے لیے انہیں اس رہائشی اسکول میں رکھ کر ان کے تعلیم کا بہتر نظم کیا جائے گا۔
