ڈاکٹر فاروق علی بھاگلپور کی مقبول ترین و فعال شخصیتوں میں سے ایک ہیں جو تعلیمی میدان کے ساتھ ساتھ سماجی کاموں میں بھی ہمیشہ پیش پیش رہتے ہیں اور ہندو مسلم اتحاد کو فروغ دینے کے لیے ہمیشہ کوشاں رہے ہیں۔
جواہر لال یونیورسٹی سے پی ایچ ڈی کی سند حاصل کرنے کے بعد ڈاکٹر فاروق علی بھاگلپور کے تلکا مانجھی یونیورسٹی کے ٹی این بی کالج میں پروفیسر کے عہدہ پر فائز ہوئے اور شاندار تعلیمی ریکارڈ کے پیش نظر سبکدوشی کے بعد انہیں بی این منڈل یونیورسٹی مدھے پورہ کا پرو وائس چانسلر بنایا گیا۔
جہاں انہوں نے اپنی کارکردگی سے یونیورسٹی کو ریاست کی صف اول کی یونیوسٹیز میں شامل کرانے میں اہم کردار ادا کیا۔
بی این منڈل یونیورسٹی کے سابق وائس چانسلر ڈاکٹر اودھ کشور نارائن ان کو وائس چانسلر بنائے جانے پر خوشی کا اظہار کرتے ہوئے امید جتائی کہ ڈاکٹر فاروق علی جئے پرکاش یونیورسٹی کیلئے ایک اثاثہ ثابت ہوں گے۔
ڈاکٹر فاروق علی کو وائس چانسلر کے طور پر ملی اس نئی ذمہ داری سے بھاگلپور کا دانشور طبقہ انتہائی خوش ہے اور وسیم بریلوی کے اس شعر کے ساتھ مبارک باد دے رہا ہے کہ
جہاں رہے گا وہیں روشنی لٹائے گا
کسی چراغ کا اپنا مکاں نہیں ہوتا
