اتل کمار انجان نے وزیر اعظم نریندر مودی پر تنقید کرتے ہوئے کہا وزیراعظم کا ہر کام جھوٹ پر مبنی ہے، ان کے جھوٹ کی ایک ڈائری تیار ہو جائے گی۔
انہوں نے کہا کہ وزیراعظم نے نوٹ بندی کرکے کہا کہ اس سے دہشت گردوں کی کمر ٹوٹ جائے گی، کالا دھن واپس آئے گا، بے روزگاروں کو روزگار کے مواقع فراہم ہوں گے، بھارتی عوام کے اکاؤنٹ میں پندرہ پندرہ لاکھ روپے آجائیں گے، کیا ان میں سے ایک بھی کام ہوا۔
اتل کمار انجان نے پیگاسس معاملے پر بات کرتے ہوئے کہا کہ 'پیگاسس معاملہ آپ سب کے سامنے ہے، سرکار نے کس طرح لیڈران اور صحافیوں کی جاسوسی کروائی ہے، آج مخالف پارٹی کا ہر ایک لیڈر اس کی جانچ کی مانگ کر رہا ہے تاہم حکومت جانچ سے دور بھاگ رہی ہے۔
انہوں نے کہا کہ آج ملک معاشی بحران سے گزر رہا ہے، مزدور اور غریب طبقہ فاقہ کشی کو مجبور ہے مگر اس حکومت کو صرف اپنی پارٹی کی تشہیر کے علاوہ کچھ اور دکھائی نہیں دیتا۔ یہ ملک کے مستقبل کے لئے ایک خطرہ ہے جسے اس ملک کی عوام کو بھی سمجھنا پڑے گا۔
مزید پڑھیں:
راجیو گاندھی کھیل رتن ایوارڈ کا نام میجر دھیان چند کردیا گیا
اتل کمار انجان نے مزید کہا کہ کورونا وبا میں گیس سلنڈر کی کمی کی وجہ سے کتنے لوگوں کی موت ہوئی مگر مودی حکومت سرے عام جھوٹ بولتی ہے کہ سلنڈر کی کمی سے کسی کی موت نہیں ہوئی،اس حکومت میں جھوٹ کی انتہا ہو گئی ہے، یہ حکومت جا کر ان غریب اور یتیم بچوں سے پوچھے جنہوں نے اپنوں کو کھویا ہے، شاید اسے اس کا احساس ہو۔
