بہار میں ریاستی حکومت کے ذریعہ جلد ویکسن مہیا کرانے کے اعلان کے بعد سے کورونا سے بچاؤ کو دیکھتے ہوئے محکمہ صحت نے بھی تیاری شروع کر دی ہے۔
ارریہ صدر ہسپتال انتظامیہ بھی ویکسین آنے کو لے کر ضروری تیاریوں میں جٹ گیا ہے۔ پہلے مرحلے میں ہسپتال سے جڑے ملازمین کو ویکسین دیے جانے کا منصوبہ ہے۔ اس دائرے میں سبھی سرکاری و غیر سرکاری ہسپتالوں میں کام کرنے والے ملازمین کے ساتھ ساتھ آئی سی ڈی ایس کے ملازمین کو بھی شامل کیا گیا ہے۔
اس بابت ارریہ صدر ہسپتال کے سول سرجن انچارج ڈاکٹر ڈین این پی شاہ نے بتایا کہ ہم لوگوں کو اطلاع ملی ہے جنوری یا فروری تک کورونا ویکسن ارریہ صدر ہسپتال پہنچ جائے گی جس کے لئے تیاری کی جارہی ہے۔ پہلے مرحلے میں ویکسین دیے جانے کو لیکر ڈاٹا تیار کیا جا رہا ہے۔ دسمبر ماہ کے آخر ہفتہ تک یہ ڈاٹا مکمل ہو جائے گا۔ اس کے بعد اسے محکمہ صحت کے متعلقہ پورٹل پر اپلوڈ کیا جائے گا، تاکہ ریاستی حکومت کو یہاں ویکسین دیے جانے والے ملازمین کی تعداد معلوم ہو، یہ ویکسین ملازمین کے لئے بالکل مفت ہوگی۔
ڈاکٹر ڈی این پی شاہ نے مزید بتایا کہ جن ملازمین کو یہ ویکسن مفت میں دی جائے گی ان میں ہسپتال ملازمین کے علاوہ آئی سی ڈی ایس ملازم، ایل ایس ملازمین، سی ڈی پی او اور ڈی پی او دفتر میں کام کرنے والے ملازمین بھی ان میں شامل ہیں۔
انہوں نے بتایا کہ ویکسین کے رکھ رکھاؤ کو لیکر بھی محکمہ صحت بہتر نظم کر رہا ہے۔ ویکسین کو رکھنے کے لئے تین سے پانچ ڈگری تک کا آئی ایل آر تیار کیا جا رہا ہے، امید ہے پہلے مرحلے کے بعد دوسرے مرحلے میں حکومت کی جانب سے عوام کے لئے ویکسین مہیا کرائی جائے۔
