ریاست بہار کے ضلع بھاگلپور میں منعقدہ ایک انتخابی ریلی میں آر جے ڈی رہنما اور وزیر اعلی عہدہ کے امیدوار تیجسوی یادو نے روزگار اور بدعنوانی کے معاملے پر نتیش کمار پر حملہ بولا۔
تیجسوی یادو نے کہا کہ بھاگلپور میں ہوئے ہزاروں کروڑوں روپے کے سرجن گھوٹالے کے ملزمین کو نتیش کمار سزا دلانے کے بجائے بچانے کی کوشش کرتے رہے ہیں۔
ناتھ نگر کے سی ٹی ایس میدان میں کانگریس امیدوار اجیت شرما کی حمایت میں ریلی سے خطاب کرتے ہوئے تیجسوی یادو نے کہا کہ بلاک سطح پر کوئی بھی کام کروانے کے لیے چڑھاوا چڑھانا پڑتا ہے۔ بدعنوانی اپنے شباب پر ہے، لہذا یہ بدلاؤ کا وقت ہے اور ہمیں موقع دیجئے ہم بہار کو ایک ترقی یافتہ ریاست بنائیں گے۔
تیجسوی یادو نے یہاں بھی روزگار دینے کا وعدہ کیا۔ انہوں نے کہا کہ ہماری حکومت بنتے ہی ہم نوکری دینے کا کام کریں گے۔
یہ بھی پڑھیں: سہسرام : تیجسوی یادو کی نکتہ چینی
انہوں نے لوگوں سے اپیل کی کہ جو لوگ مذہب اور ذات پات کے نام پر ووٹ مانگنے آئیں، آپ ان سے روزگار مانگیں۔ ساتھ ہی انہوں نے وعدہ کیا کہ ان کی حکومت بننے کے بعد کسی کو فارم بھرنے کے لیے فیس نہیں دینی ہوگی اور امتحان مراکز پر جانے کے لیے امیدواروں کو مفت پاس دیا جائے گا۔
تیجسوی یادو نے انتہائی مختصر تقریر کی۔ لوگوں کے جوش کو دیکھتے ہوئے آر جے ڈی رہنماؤں کو اپنی جیت صاف دکھ رہی ہے۔
آر جے ڈی کی طرف سے انتخابی مہم کی ذمہ داری تیسجوی یادو نے اکیلے اپنے کندھے پر اٹھا رکھا ہے۔ ایک ایک دن میں ایک درجن انتخابی ریلیوں سے خطاب کر رہے ہیں اور جس طرح لوگوں کی بھیڑ جٹ رہی ہے، اس سے آر جے ڈی خیمہ کافی خوش ہے۔ لیکن سوال یہ اٹھتا ہے کہ کیا یہ بھیڑ ووٹ میں تبدیل ہوگی۔
