ہم آج جس آزاد فضا میں سانس لے رہے ہیں اس آزادی کے لئے ہمارے اسلاف نے جان و مال کی بڑی قربانیاں دی ہیں لیکن ہماری نئی نسل ان قربانیوں سے ناواقف ہے۔
لہٰذا بچوں کو اس سے متعلق معلومات فراہم کرنے کی غرض سے 'ناگرک سیوا سمیتی' کے زیر اہتمام چمیلی چک میں واقع جدید اسلامیہ اردو اسکول میں شاہ محدث دہلوی رحمت اللہ علیہ کی شخصیت پر ایک تقریری مقابلہ کا اہتمام کیا گیا۔ جس میں طلباء طالبات نے کثیر تعداد میں شرکت کی۔
اس تقریری مقابلے میں شریک طلباء کی تقریر سے ہمارے اس عظیم الشان بزرگ اور انگریزوں کے خلاف سب سے پہلے فتویٰ دینے والے شاہ عبد العزیز محدث دہلوی رحمت اللہ علیہ کے بارے میں واقفیت کا فقدان صاف نظر آیا۔
جس سے اس طرح کے پروگرام کی اہمیت میں مزید اضافہ ہوجاتا ہے۔
وہیں اس پروگرام میں قومی کونسل برائے فروغ اردو زبان کے رکن التمش بہاری اور مسلم ہائی اسکول کے پرنسپل انجینئر اسلام حسین اور دیگر لوگ بھی موجود تھیں۔
ان لوگوں کا ماننا تھا کہ کچھ تو ہماری حکومتوں نے مسلم مجاہد آزادی کے تئیں غفلت برتی اور دوسری طرف خود ہماری لاپرواہی کے سبب ان کے نقوش مٹتے جا رہے ہیں لہذا موجودہ وقت میں ایسے پروگرام کی سخت ضرورت ہے۔ پروگرام کے اختتام پر بہترین تقریر کرنے والے بچے اور بچیوں کو اعزازات سے بھی نوازا گیا۔
واضح رہے کہ 'ناگرک سیوا سمیتی' کی جانب سے مسلم مجاہد آزادی پر مسلسل اس طرح کے پروگرام کیے جا رہے ہیں تاکہ اقلیتوں کے بچوں کو اپنے اسلاف کی قربانیوں کا علم ہو اور یہ پروگرام بھی اسی کڑی کے طور پر منعقد کیا گیا جس کی سبھی نے پذیرائی کی۔
