سمستی پور ریل ڈویژن کے آر پی ایف کے کمانڈینٹ انشومان رام تریپاٹھی نے معطلی کی تصدیق کرتے ہوئے آج یہاں بتایا کہ مسٹر وشو کرما کے خلاف دربھنگہ جنکشن پر غیر معیاری پانی فروخت کروانے کا الزام تھا۔
اس سے متعلق شکایت ملنے پر آر پی ایف ( حاجی پور ) کے پولیس انسپکٹر جنرل کی ہدایت پر حاجی پور دفتر کی خصوصی ٹیم نے 29 جون کو جنکشن پہنچ کر معاملے کی تفتیش کی تھی۔
اس دوران دربھنگہ جنکشن پر کھلے عام غیر معیاری پانی فروخت کرنے کے معاملے کی تصدیق ہوئی اور فورس کے سنیئر افسران کی ٹیم نے جنکشن کے مختلف پلیٹ فارم اور کئی ریل گاڑیوں میں چھاپے ماری کر کے پانچ غیر قانونی وینڈروں کو قریب 200 غیر معیاری پانی کے بوتلوں کے ساتھ گرفتار کیا تھا۔
مسٹر تریپاٹھی نے بتایاکہ معطل کئے گئے پوسٹ انچارج مسٹر وشو کرما کے مقام پر جلد ہی نئے انچارج کی تقرری کر دی جائے گی۔ انہوں نے بتایاکہ مسٹر وشوکرما کے خلاف محکمہ جاتی جانچ بھی شروع کی گئی ہے ۔
غورطلب ہے کہ سخت گرمی کا فائدہ اٹھاکر غیر قانونی طور سے غیر معیاری پانی کا کاروبار دربھنگہ اور اس کے آس پاس کے کئی اسٹیشنوں پر جاری تھا۔ ایسا کہا جاتا ہے کہ اس سے جی آر پی اور آر پی ایف کا تحفظ حاصل تھا۔ اس کی اطلاع آرپی ایف کے ڈائریکٹر جنرل کو دی گئی تھی۔ جس کے بعد یہ کاروائی کی گئی۔
