ضلع بارہمولہ کے سوپور قصبہ میں انصار النساء نامی ایک غیر سرکاری تنظیم نے وادی کشمیر میں خود کشی کے بڑھتے واقعات کے عنوان پر ایک روزہ سمینار کا انعقاد کیا جس میں کئی مقامی طالبات نے شرکت کی۔
سیمنار کے دوران مقررین نے خود کشی کے بڑھتے واقعات پر تشویش کا اظہار کرتے ہوئے والدین سے اپنے بچوں کا خصوصی خیال رکھنے پر زور دیا گیا۔
مقررین نے کہا کہ گھریلو تشدد، دینی علوم سے دوری اور اقتصادی مسائل کے سبب وادی کشمیر میں خودکشی کا رجحان بڑھتا جا رہا ہے۔ انہوں نے کہا کہ سرکار، انتظامیہ، والدین اور سماج کے سبھی افراد کو ان مسائل کا حل تلاش کرنے کی ضرورت ہے جس کے بعد ہی خودکشی کے واقعات میں کمی واقع ہو سکتی ہے۔
سیمنار میں آئی مقامی طالبات نے بھی خود کشی اور گھریلو تشدد سے متعلق مقالات پڑھے۔
مزید پڑھیں: سوپور میں پانی قلت سے عوام پریشان
اس موقع پر ای ٹی وی بھارت کے ساتھ بات کرتے ہوئے پروگرام کی منتظم ڈاکٹر مبینہ رمضان نے بتایا: ’’خود کشی کے بڑھتے واقعات یقینا باعث تشویش ہیں، خودسوزی کے واقعات میں اضافہ ہوتا جا رہا ہے، ان واقعات کو روکنے کے لیے سماج کے سبھی افراد کو آگے آکر خودکشی کے واقعات کی اصل وجوہات تلاش کرکے انکے سد باب کے لیے اپنا کلیدی کردار ادا کرنے کی ضرورت ہے۔‘‘
انہوں نے مزید کہا کہ بیروزگاری، تنگدستی اور دینی علوم سے دوری خودکشی کے بڑھتے واقعات کی بڑی وجوہات ہیں۔ انہوں نے مزید بتایا کہ نوجوان طبقہ دینی علوم سے دور ہونے کے سبب برے کاموں/عادات کی طرف مائل ہو رہے ہیں۔
