شمالی کشمیر میں ضلع بارہمولہ کے قصبہ سوپور میں پندرہ سال پہلے نسیم باغ کالونی میں واقع ایف سی آئی کے گودام میں چاول رکھا گیا جو اب مکمل طور خراب ہو چکا ہے۔
اس موقعے پر ای ڈی وی بھارت کے ساتھ بات کرتے ہوئے مدثر احمد نامی ایک مقامی باشندے کا کہنا تھا کہ ’’اس گودام کے اندر اس وقت بھی کافی چاول ہے لیکن وہ سارا سڑا ہوا ہے جس کی وجہ سے آس پڑوس کی آبادی اسکی بدبو سے پریشان ہو چکی ہے۔‘‘
انہوں نے مزید کہا کہ کوروناوائرس کی وجہ سے عام لوگ پہلے سہمے ہوئے ہیں اور اب انہیں اس بدبو اور گودام سے نکلنے والی زہریلی گیس سے نئی بیماری پھوٹ پڑنے کا اندیشہ لگ رہا ہے۔
انہوں نے دعویٰ کیا کہ اس معاملے میں انہوں نے کئی بار متعلقہ حکام کی توجہ اس جانب مبذول کرائی تاہم ’’انکے کانوں پر جوں تک نہ رینگی۔‘‘
مقامی آبادی نے متعلقہ حکام سے اپیل کرتے ہوئے کہا کہ نسیم باغ میں واقع اس گودام سے گلا سڑا چاول نکال کر اسے ٹھکانے لگایا جائے تاکہ مقامی آبادی کو بدبو سے نجات حاصل ہو سکے۔
