بارہمولہ: شمالی کشمیر میں ضلع بارہمولہ کے سرحدی علاقے اوڑی میں گھر کوٹ علاقے کے باشندوں نے پی ایم جی ایس آئی (PMGSY) کے خلاف احتجاج کرتے ہوئے حکام پر ان کے علاقہ کو نظر انداز کرنے کا الزام عائد کیا۔ احتجاج میں شامل لوگوں نے بتایا کہ تین برسوں سے سڑک پر کام جاری ہے تاہم رابطہ سڑک ابھی بھی نا مکمل ہے اور سڑک انتہائی خستہ حال ہونے سے لوگوں کو عبور و مرور میں پریشانیوں کا سامنا کرنا پڑ رہا ہے۔
گھرکوٹ علاقے سے تحصیل صدر مقام آئے لوگوں نے سب ڈویژن مجسٹریٹ، اوڑی کے دفتر کے باہر احتجاج کیا۔ انہوں نے محکمہ پی ایم جی ایس آئی کے خلاف نعرے بازی بھی کی۔ احتجاجیوں نے بتایا کہ ’’مری کلر رابطہ سڑک کئی برسوں سے خستہ حالی کی شکار ہے، برسوں سے کام جاری ہے تاہم نامعلوم وجوہات کی بنا پر سڑک کی تعمیر مکمل نہیں ہو پا رہی جس کا خمیازہ راہگیروں، مقامی باشندوں کو بھگتنا پڑ رہا ہے۔‘‘ انہوں نے مزید کہا کہ خستہ حال سڑک کے گرد دیواربندی نہ ہونے اور پختہ ڈرین نہ ہونے کے سبب کھیتوں کو بھی نقصان پہنچتا ہے۔
احتجاج میں شامل لوگوں نے میڈیا نمائندوں کے ساتھ بات کرتے ہوئے کہا کہ ’’علاقے کی رابطہ سڑک پر کام انتہائی سست رفتاری سے چل رہا ہے اور ٹھیکہ دار من مرضی پر کام کر رہا ہے، کوئی پوچھنے والا نہیں۔‘‘ انہوں نے دعویٰ کیا کہ ’’سرک کی کشادگی کے لیے لوگوں نے اپنی اراضی بھی وقف کی تاہم نہ تو سڑک ہی تعمیر ہو پا رہی ہے اور نہ ہی اراضی مالکان کو اس کا معاوضہ ہی مل پا رہا ہے۔ احتجاجیوں نے انتظامیہ سے سڑک کی تعمیر و مرمت میں سرعت لائے جانے کا مطالبہ کیا ہے۔ ادھر، اسی سلسلے میں متعلقہ محکمہ - پی ایم جی ایس وائی - کے افسران سے بات کرنے کی کوشش کی گئی تاہم ان سے رابطہ قائم نہ ہو سکا۔
مزید پڑھیں: Baramulla URI Road Closed: بارہمولہ اوڑی شاہراہ ٹریفک کے لیے بند
