شمالی کشمیر کے ضلع بارہمولہ میں سوپور قصبہ کے سنگرامہ حلقہ سے تعلق رکھنے والی بی ڈی سی چیرپرسن شمیمہ اختر نے انتظامیہ سے انہیں سیکورٹی فراہم کرنے کی گزارش کی ہے۔
شمیمہ کے مطابق بی ڈی سی فارم بھرنے کے وقت انتظامیہ نے انہیں معقول سیکورٹی فراہم کرنے کا وعدہ کیا تھا ’’لیکن بدقسمتی سے آج تک ایسا نہیں کیا گیا۔‘‘
انہوں نے کہا کہ ’’ہم عوامی نمائندے ہیں، سرکاری اسکیمیں اور دیگر معلومات اپنے علاقہ جات میں گھر گھر پہنچاتے ہیں، ہم دن رات کام میں محو رہتے ہیں اس وجہ سے سرکار کو بھی چاہیے کہ وہ ہمارا خیال رکھے، خصوصاً ہماری حفاظت کے حوالے سے۔‘‘
شمیمہ کے مطابق ’’کشمیر کے موجودہ صورتحال کو مد نظر رکھتے ہوئے گھر گھر جاکر عوام کے رابطے میں رہنا آسان کام نہیں، ایسا کرکے ہم خود کو اور اپنے اہل و عیال کو خطرے میں ڈال رہے ہیں، تاہم اس کے باوجود ہماری حفاظت کے تعلق سے انتظامیہ سنجیدہ نہیں۔‘‘
انہوں نے انتظامیہ کو تنقید کا نشانہ بناتے ہوئے دعویٰ کیا کہ صرف اثر و رسوخ رکھنے والے افراد کو ہی سیکورٹی فراہم کی جا رہی ہے۔
