ضلع انتظامیہ بارہمولہ کی جانب سے بارہمولہ سے تعلق رکھنے والے غریب اور پسماندہ کنبوں کے لیے کھانے پینے کا سامان اور نقدی فراہم کرنے کے اقدامات اٹھائے جا رہے ہیں۔
اس سلسلے میں جمعرات کو محکمہ امور صارفین کی جانب سے عید کی آمد کے پیش نظر غریب اور پسماندہ کنبوں میں امدادی سامان تقسیم کیا گیا۔
اس موقعے پر اسسٹنٹ ڈائریکٹر فوڈ اینڈ سپلائیز نے ای ٹی وی بھارت کے ساتھ بات کرتے ہوئے کہا کہ عید کی آمد آمد ہے اور ضلع انتظامیہ نے غریب اور پسماندہ کنبوں کے لیے فوڈ کِٹس جس میں چاول، آٹا، دالیں، تیل، صابن وغیرہ ضروریات روزمرہ کے سازو سامان کے علاوہ نقد رقم بھی دی گئی۔
انہوں نے کہا کہ ضلع انتظامیہ کی جانب سے یہ قدم اس لیے اٹھایا گیا تاکہ غریب اور پسماندہ کنبوں کے افراد بھی کما حقہ عید کی خوشیاں منا سکیں۔
واضح رہے کہ کورونا وائرس سے پیدا شدہ صورتحال سے جہاں ہرشعبہ متاثر ہوگیا وہیں اس کا سب سے زیادہ اثر مسکینوں اور یومیہ مزدوری پر زندگی گزارنے والے غریب اور پسماندہ کنبوں پر پڑا۔
