شمالی کشمیر کے ضلع بارہمولہ میں سوپور فروٹ منڈی میں محکمہ ہارٹیکلچر اینڈ پلاننگ کی جانب سے فروٹ گروورس کے لئے ایک تربیتی پروگرام کا اہتمام کیا گیا۔
پروگرام کے دوران کاشتکاروں کو مختلف سرکاری اسکیموں کے بارے میں جانکاری دی گئی وہیں انہیں جدید تکنیک سے بھی آگاہ کیا گیا۔
کیمپ کے دوران میوہ صنعت سے جڑے افراد نے فروٹ گروورس کو درپیش مشکلات خصوصا نقلی ادویات اور کھاد سے متعلق افسران کو آگاہ کیا۔
ڈاریکٹر ہارٹیکلچر نے بتایا کہ محکمہ کی جانب سے ضلع بارہمولہ کے مختلف علاقوں میں اس طرح کے پروگرام جاری رکھیں جائیں گے تاکہ ’’فروٹ گروورس کو درپیش مشکلات کا جلد ازالہ ہو سکے۔‘‘
فروٹ منڈی سوپور کے صدر فیاض احمد نے ذرائع ابلاغ کے ساتھ بات کرتے ہوئے اس طرح کے کیمپ کے انعقاد پر محکمہ باغبانی کا شکریہ ادا کرتے ہوئے کہا کہ محکمہ کو زمینی سطح پر فروٹ گروورس کو درپیش مسائل کا جلد ازالہ کرنے کے لیے سنجیدہ اقدامات اٹھانے چاہئے۔
انہوں نے الزام عائد کرتے ہوئے کہا کہ بازار میں ہر جگہ غیر معیاری اور نقلی ادویات اور کھاد دستیاب ہے جس کو پوری طرح قابو کرنے کے لیے محکمہ سمیت انتظامیہ کو بھی ٹھوس اقدامات اٹھانے کی ضرورت ہے۔
