ضلع بارہمولہ میں سوپور قصبہ کے بابا یوسف علاقے میں قریب تین سال قبل سرکار نے میریج ہال (کمیونٹی سنٹر) کی تعمیر کا کام شروع کیا جسے نا معلوم وجوہات کی بنا پر ادھورا چھوڑ دیا گیا۔
اس وقت یہ ادھوری اور خستہ حال عمارت اوباش نوجوانوں کا پسندیدہ ٹھکانہ بن چکی ہے جس سے مقامی آبادی کو فکر و تشویش لاحق ہے۔
ای ٹی وی بھارت کے ساتھ بات کرتے ہوئے مقامی باشندوں کا کہنا ہے کہ عوام کی فلاح و بہبود کی غرض سے انتظامیہ نے کمیونٹی سینٹر کی تعمیر شروع کی، تاہم فلاح و بہبود کے برعکس اس سے علاقے کے باشندوں کو مشکلات سے دوچار ہونا پڑ رہا ہے۔
انہوں نے مزید کہا کہ ویران و خستہ حال عمارت جوئے کے اڈے میں تبدیل ہو چکی ہے اور اکثر و بیشتر اوباش نوجوان یہاں منشیات کا استعمال کرتے ہیں جو مقامی آبادی کے باعث تشویش ہے۔
انہوں نے کہا کہ کام ادھورا چھوڑے جانے کے باعث عمارت نئی ہونے کے باوجود خستہ حال ہو چکی ہے۔ وہیں، یہ ویران عمارت آوارہ کتوں کی آماجگاہ بن چکی ہے۔
مقامی لوگوں نے انتظامیہ سے اس کی تعمیر جلد مکمل کرنے کے علاوہ عمارت میں چوکیدار تعینات کرنے کی درخواست کی ہے۔
