کشمیر وادی کے ساتھ بانڈی پورہ ضلع کے سرحدی علاقہ گریز میں چند روز پہلے شدید بارش کے باعث سڑکوں اور دیگر تعمیرات کے ساتھ ساتھ یہاں کے کئی واٹر سپلائی کے نظام کو نقصان پہنچا ہے۔ اس کے باعث یہاں کے کئی علاقے پینے کے صاف پانی سے محروم ہوگئے ہیں۔
مقامی لوگوں کا مطالبہ ہے کہ پانی کے سپلائی کے سسٹم کو جلد از جلد علاقے میں بحال کیا جائے اور اس دوران پہاڑی علاقوں تک کسی دیگر متبادل طریقہ کار سے پانی پہنچایا جائے۔
ای ٹی وی بھارت کے ساتھ بات کرتے ہوئے ٹرائیبل رہنما میر حمید الاگریزی نے کہا کہ تیز بارش کے باعث علاقے میں سڑکوں اور پلوں کو کافی نقصان پہنچا ہے، جن کو درست کرنے میں وقت لگے گا لیکن پہاڑی علاقوں تک پانی کو فوری طور پر پہنچانا بہت ضروری ہے۔
بانڈی پورہ کے اسسٹنٹ ترقیاتی کمشنر ظہور احمد میر نے علاقے میں آبی فراہمی کے متعلق کئے جا رہے کاموں کی جانکاری دیتے ہوئے بتایا کہ متعلقہ محکمہ کام کر رہا ہے اور علاقے میں آبی فراہمی کو جلد ہی درست کر لیا جائے گا۔ انہوں نے کہا کہ فی الحال علاقے میں ٹینکر خدمات فراہم کیا جا رہا ہے تاکہ لوگوں کے سامنے پانی کا مسئلہ نہ کھڑا ہو۔
