بانڈی پورہ میں کورونا ویکسینیشن اور ماس سیمپلنگ جاری

شمالی کشمیر کے ضلع بانڈی پورہ میں کورونا وائرس سے متاثرہ افراد کی تعداد میں لگاتار کمی واقع ہو رہی ہے۔ وہیں ہیلتھ ورکرز کی جانب سے گھر گھر جاکر عوام کو ویکسینیشن کے لیے آمادہ کرنے کی مہم میں تیزی لائی جا رہی ہے۔

ضلع بانڈی پورہ گزشتہ برس کووڈ 19 کے حوالے سے کافی متاثرہ ضلع تصور کیا جا رہا تھا تاہم ان دنوں کورونا وائرس کے مثبت معاملات میں کافی کمی واقع ہو رہی ہے جبکہ انتظامیہ کی جانب سے گھر گھر جاکر لوگوں کو ویکسینیٹ کیے جانے کے عمل میں تیزی لائی جا رہی ہے۔

وبائی صورتحال پر قابو پانے کے لئے محکمہ صحت سے وابستہ افراد گھر گھر جاکر لوگوں کو ویکسین لگوانے کے لئے آمادہ کر رہے ہیں، اس کے علاوہ ماس سیمپلنگ کے تحت گھر گھر جاکر لوگوں کے ٹیسٹ بھی کئے جا رہے ہیں۔

ضلع بانڈی پورہ کے کئی دیہات میں 45برس سے زائد عمر کے افراد کو کورونا مخالف ویکسین دی جا چکی ہے وہیں ضلع کا دور افتادہ علاقہ ووین ملک کا پہلا ایسا گائوں جہاں 18برس سے زائد عمر کی 100آبادی کو کورونا ویکسین فراہم کی گئی۔

ہیلتھ ورکروں نے عوام الناس سے فرنٹ لائن وارئرس کا تعاون دینے اور از خود ویکیسین کے لیے سامنے آنے کی اپیل کی ہے۔