گریز سڑک حادثہ میں ایک شخص ہلاک، 5 زخمی

ضلع بانڈی پورہ میں گریز کے چک نالہ گاؤں کے قریب ایک گاڑی اور ٹرک میں تصادم کی وجہ سے ایک شخص کی موت ہوگئی ہے جبکہ پانچ دیگر افراد زخمی ہوگئے ہیں۔

شمالی کشمیر کے بانڈی پورہ ضلع میں گریز کے علاقے برنائی کے قریب چک نالہ میں جمعرات کی شام سڑک حادثہ میں ایک شخص کی موت ہوگئی جبکہ پانچ افراد زخمی ہوگئے۔

ایک سینئر پولیس افسر نے بتایا کہ چک نالہ گاؤں میں مسفروں سے بھری گاڑی ٹرک سے ٹکرا گئی جس کے نتیجے میں ڈرائیور کی موقع پر ہی موت ہوگئی۔

جاں بحق ہونے والے شخص کی شناخت محمد نجم الدین ولد شیر محمد کے نام سے ہوئی ہے جو گریز کے علاقے گجران تلیل کا رہائشی ہے۔

افسر نے بتایا کہ گاڑی میں سفر کرنے والے مزید پانچ افراد زخمی ہوگئے ہیں جنہیں علاج کے لیے قریبی اسپتال منتقل کردیا گیا ہے، زخمی افراد کی شناخت تاحال معلوم نہیں ہو سکی۔