شمالی کشمیر کے ضلع بانڈی پورہ میں واقع پانار کے لوگوں نے انتظامیہ کے خلاف احتجاج کرتے ہوئے یہ الزام عائد کیا ہے کہ محمکہ آر اینڈ بی علاقے کی سڑکوں سے برف ہٹانے میں مکمل طور پر ناکام رہا ہے، جس کی وجہ سے عام لوگوں کے ساتھ ساتھ مریضوں کو بھی کافی مشکلات کا سامنا کرنا پڑ رہا ہے۔
مقامی لوگوں کے مطابق احم شریف کی سڑکیں برف سے ڈھکی ہوئی ہیں جس کو ابھی تک صاف نہیں کیا گیا ہے، جس سے مقامی لوگوں کے نقل و حرکت میں رکاوٹ پیدا ہوتی ہے، جب کہ بیماروں کو چارپائیوں کے ذریعہ کندھوں کے سہارے ضلع اسپتال لے جانا پڑتا ہے۔
لوگوں کا مزید کہنا ہے کہ مریضوں کو اپنے کندھوں پر 2 کلومیٹر تک لے کر احم شریف پہنچنا پڑتا ہے جہاں سے انہیں گاڑی کے ذریعہ ضلع اسپتال بانڈی پورہ پہنچایا جاتا ہے۔
مقامی لوگوں نے انتظامیہ سے اپیل کرتے ہوئے کہا کہ گاؤں تک جانے والی سڑکوں سے جلد سے جلد برف کو صاف کیا جائے تاکہ لوگوں کو مشکلات کا سامنا نہ کرنا پڑے۔ وہیں لوگوں نے ڈپٹی کمشنر سے بذات خود گاؤں کا دورہ کر کے صورتحال کا جائزہ لینے کی گزارش کی ہے۔
انہوں نے بتایا کہ برف سے ڈھکی سڑک کی وجہ سے گاؤں کے بیشتر بچوں کو پولیو کے قطرے بھی نہیں پلائے جاسکے، ان کا کہنا تھا کہ گاڑیاں گاؤں تک نہیں پہنچ سکی جس کی وجہ سے حفاظتی ٹیکوں کے عملے کو کافی مسافت بھی طئے کرنا پڑا جس کی وجہ سے وہ سب تک نہیں پہنچ سکے۔
