ڈی سی بانڈی پورہ ڈاکٹر اویس احمد نے بانڈی پورہ کے لوگوں سے عالمی وبا کورونا وائرس کے پھیلائو کو روکنے کے لیے وضع کیے گئے رہنما خطوط پر سختی سے عمل کرنے کی تلقین کی۔
انہوں نے عوام سے انتظامیہ کی جانب سے عید کے حوالے سے جاری کیے گئے احکامات کی پابندی کرنے کی اپیل کرتے ہوئے کہا کہ ’’عید نماز کے بڑے اجتماعات پر پابندی عائد کی گئی ہے۔ لوگوں کو مقامی مساجد میں سماجی فاصلہ برقرار رکھتے ہوئے عید کی نماز ادا کرنے کی اجازت دی گئی ہے۔‘‘
ڈی سی بانڈی پورہ نے عوام سے غیر ضروری طور بھیڑ بھاڑ جمع کرنے سے پرہیز کرنے کی اپیل کرتے ہوئے کورونا وائرس کے پھیلائو کو روکنے کے لیے وضع کیے گئے ایس او پیز پر سختی سے عمل کرنے کی تلقین کی۔
مزید پڑھیں؛ بانڈی پورہ: پانی کے لیے ڈیڑھ کلو میٹر کا سفر طے کرنا پڑتا ہے
ویکسینیشن کے حوالے سے تفصیلات فراہم کرتے ہوئے ڈی سی بانڈی پورہ نے کہا کہ ضلع میں 45برس سے زائد عمر کے افراد کا ویکسینیشن عمل پہلے ہی مکمل کیا جا چکا ہے، جبکہ 18سال سے زائد عمر کے 45ہزار افراد کو کورونا مخالف ٹیکے لگائے گئے ہیں۔
انہوں نے عوام خصوصا نوجوانوں سے از خود سامنے آکر کورونا مخالف ویکسین کی خوارک لینے کی اپیل کی۔
