شمالی کشمیر کے ضلع بانڈی پورہ کے حاجن علاقے میں کسانوں کو دھان کی فصل کے لئے آبپاشی کا پانی کچھ عرصے سے دستیاب نہیں ہو رہا ہے۔ اس وجہ سے نہ صرف یہ کسان کافی پریشان ہیں بلکہ پانی دستیاب نہ ہونے کی وجہ سے ہزاروں کنال اراضی پر کاشت کی گئی دھان کی فصل کے خراب ہونے کا اندیشہ ہے۔
مقامی لوگوں کا کہنا ہے کہ بنگِن تار کے مقام پر نصب آبپاشی واٹر پمپ سے پچھلے پندرہ روز سے پانی کی سپلائی بند ہے جس وجہ سے مزید دو آبپاشی پمپ بھی بےکار ہوگئے ہیں اور یوں کسانوں کو اس وقت آبپاشی کے لئے پانی دستیاب نہیں ہے۔
کسانوں کا کہنا ہے کہ اگر انھیں اس وقت پانی فراہم نہیں ہوا تو ان کی دھان کی فصل تباہ ہوسکتی ہے۔
ادھر محکمہ اری گیشن کا کہنا ھے کہ خُشک سالی کی وجہ دریائے جہلم میں پانی کی سطح کا کم ہونا ہے۔ ان کا کہنا ہے کہ اس کے باعث کچھ مقامات پر پانی کی سپلائی متاثر ہوگئی ہے۔ تاہم محکمے کا مزید کہنا ہے کہ وہ اس مسئلے کو حل کرنے کے لئے اپنی طرف سے مسلسل کوشش کر رہا ہے۔
ظاہر ہے محکمہ کو محض دلیل سے کام نہیں چلانا ہوگا بلکہ عملی سطح پر کام کر کے علاقے میں پانی کی فراہمی کو یقینی بنانا ہوگا ورنہ ضلع میں زراعت کی کمی سے بڑا نقصان ہو سکتا ہے۔
