ضلع بانڈی پورہ کے کلوسہ علاقے میں اتوار اور پیر کی درمیانی شب آگ کی ایک ہولناک واردات میں ایک رہائشی مکان سمیت گئو خانہ خاکستر ہو گئے، جبکہ تین دیگر مکانات کو جزوی نقصان پہنچا ہے۔
مقامی باشندوں کے مطابق اتوار اور پیر کی درمیانی شب سیف الدین گنائی کے مکان سے اچانک آگ نمودار ہوئی جس نے آنا فاناً مکان سمیت گئو خانہ اور تین دیگر مکانات کو بھی اپنی چپیٹ میں لے لیا۔
انہوں نے مزید کہا کہ آگ کی واردات میں سیف الدین کا مکان پوری طرح تباہ ہو گیا جبکہ دیگر تین مکانات کو بھی جزوی طور نقصان پہنچا ہے۔
آگ کی خبر موصول ہوتے ہی گرچہ فائر اینڈ ایمرجنسی محکمہ نے جاے واردات پر پہنچ کر آگ کو قابو میں کر لیا، تاہم اس دوران ایک رہائشی مکان اور گئو خانہ مکمل طور خاکستر ہو گئے۔
پولیس نے معاملہ کی نسبت کیس درج کرکے مزید کارروائی شروع کر دی ہے۔
مقامی لوگوں کے مطابق آگ کی واردات میں لاکھوں کی املاک خاکستر ہونے کے علاوہ سیف الدین گنائی کا کنبہ بے گھر ہو گیا ہے۔ انہوں نے ضلع انتظامیہ سے متاثرہ کنبے کی بازآبادکاری کی اپیل کی ہے۔
