محکمہ آر اینڈ بی نے قریب سترہ سال قبل ضلع بانڈی پورہ کے ترک محلہ، ترک پورہ میں ایک روڈ تعمیر کیا تھا۔ تاہم یہاں کے لوگوں کو اب بھی پیدل ہی سفر کرنا پڑ رہا ہے، کیونکہ ایک مقامی باشندے نے جے سی بی کی مدد سے روڈ کی کھدائی کی اور اس پر بڑے بڑے پتھر ڈال کر اسے عوامی آمد ورفت کے لئے بند کر دیا۔
سڑک کو آمد و رفت کے لیے بند کرنے والے شخص کا دعویٰ ہے کہ سترہ برس قبل اس کی زمین کو سڑک کی کشادگی کے لیے استعمال میں لایا گیا تھا جس کا آج تک اسے معاوضہ فراہم نہیں کیا گیا۔ تاہم محکمہ تعمیرات عامہ کے مطابق لوگوں نے از خود زمین وقف کی تھی جس کے لیے انہیں معاوضہ فراہم نہیں کیا جا سکتا۔
سڑک پر رکاوٹیں حائل ہونے کے سبب قریبا پچاس گھروں پر مشتمل ترک محلہ کے باشندوں کو شدید مشکلات کا سامنا کرنا پڑ رہا ہے۔ پہاڑی علاقہ ہونے کے سبب بند کیے گئے روڈ کے علاوہ دیگر کسی بھی راستے سے علاقے میں گاڑی کا پہنچنا محال ہے۔
مقامی باشندوں نے ای ٹی وی بھارت کے ساتھ بات کرتے ہوئے کہا کہ انہیں گھریلو اشیاء کو کندھوں پر لاد کر ہی لانا پڑتا ہے۔ وہیں علیل بیماروں اور طلباء کو بھی اذیتوں سے گزرنا پڑتا ہے۔
مقامی لوگوں نے دعویٰ کیا کہ انہوں نے کئی بار اس ضمن میں انتظامیہ کی جانب رجوع کیا تاہم انکے مطابق افسران صرف جائزہ لینے کیلئے آئے اور کبھی بھی ٹھوس اقدامات نہیں اٹھائے گئے۔
جب اس مسئلہ سے متعلق ڈی ڈی سی بانڈی پورہ سے رجوع کیا گیا تو انہوں نے تحصیلدار آلوسہ کو معاملہ جلد حل کرنے کے احکامات صادر کئے۔ تاہم تحصیلدار نے کیمرے کے سامنے بات کرنے انکار کرتے ہوئے کہا کہ وہ اس معاملے کو ایک یا دو دن میں حل کر لیں گے۔ وہیں انہوں نے رکاوٹیں حائل کرنے والے افراد کے خلاف قانونی کارروائی کرنے کا بھی عندیہ دیا۔
