تقریباً نو برس گزر جانے کے بعد اگرچہ ضلع ہسپتال بانڈی پورہ کو اب مکمل طور پر عوام کے لئے کھولا گیا ہے۔ تاہم ابھی بھی کئی بنیادی اور اہم سہولیات میسر نہیں ہیں۔
ہسپتال کے لئے بجلی کی ہاٹ لائن ابھی تک نہیں بچھائی گئ ہے۔ لفٹ سسٹم بھی نامکمل رکھا گیا ہے۔ اس کے علاوہ اسٹاف کی شدید قلت جبکہ ایمرجنسی کے لئے پورے ہسپتال کے لئے محض تین ایمبولینس گاڑیاں موجود ہیں جو کہ بہت پرانی ہوچکی ہیں۔
اس کے علاوہ فرنیچر اور اہم مشینری کی بھی شدید قلت نظر آرہی ہے. جس میں خصوصاً ایکسرے، الٹرا سونو گرافی مشینیں قابل ذکر ہیں۔
ضلع ہسپتال بانڈی پورہ کی عمارت کا کام آج سے تقریباً نو سال قبل دو ہزار گیارہ میں شروع کیا گیا تھا. اس دوران ضلع ہسپتال کا کام کاج ایک بہت ہی پرانی اور چھوٹی سی عمارت میں جاری تھا جس کے باعث نہ صرف یہاں کے عوام کو بلکہ ہسپتال کے عملے کو بھی آئے روز شدید مشکلات کا سامنا تھا۔
اس عرصے کے دوران نئے ہسپتال کے شروع کیے جانے کا یہاں کے عوام کے لئے ایک خواب بن گیا تھا. جوکہ پورا تو ہوا لیکن بنیادی سہولیات کے بغیر۔
یہ بھی پڑھیے
پونچھ: گولہ باری میں پانچ پاکستانی فوجی ہلاک
اس سلسلے میں فائنینشیئل کمشنر ہیلتھ اٹل ڈھلو نے ڈائریکٹر ہیلتھ سمیر احمد متو کے ساتھ ضلع ہسپتال بانڈی پورہ کا تفصیلی دورہ کر کے تمام نامکمل سہولیات کا جائزہ لیا.
اس موقعے پر ضلع ترقیاتی کمشنر بانڈی پورہ سی ایم او بانڈی پورہ اور محکمہ صحت سے منسلک دیگر افسران نے انہیں تمام ایسے نامکمل سہولیات سے آگاہ کیا اور اس بارے میں جانکاری بھی فراہم کی۔
تفصیلی جائزہ لینے کے بعد فائنینشیئل کمشنر نے یقین دلایا کہ چند مسائل کو اگلے چند روز کے دوران حل کیا جائے گا جبکہ بقیہ دیگر مسائل کو پورا کرنے میں کچھ وقت درکار ہوگا۔ تاہم انہوں نے کہا کہ بہت جلد اس ہسپتال کو سبھی بنیادی سہولیات سے لیس کیا جائے گا۔
