ریاست آندھرا پردیش کے ضلع اننت پور میں بجلی کا جھٹکہ لگنے سے دو افراد کی موت ہوگئی۔ یہ واقعہ اس وقت پیش آیا جب یہ دونوں افراد ضلع کے اورواکونڈہ گاؤں میں بجلی کے تار کے زد میں آگئے۔
پولیس نے کہا کہ رمیش اور ملیش جو دونوں بھائی تھے، خنزیروں کو پالتے ہوئے اپنا ذریعہ معاش حاصل کررہے تھے۔ ایک عہدیدار نے ان سے اصرار کیا کہ ان خنزیروں کو نواحی علاقہ لے جائے۔ جب وہ آج صبح کی اولین ساعتوں میں اپنے خنزیروں کو نواحی علاقہ لے جارہے تھے تو یہ دونوں بجلی کے تار کے زد میں آگئے جو آبپاشی کے تالاب کے قریب لگایا گیا تھا۔
ان کے رشتہ داروں اور گاؤں والوں نے پولیس اسٹیشن جانے والی سڑک کے قریب ان کی لاشوں کو رکھ کر دھرنا دیا اور نامناسب رویہ کے نتیجہ میں ان کی موت کے لیے محکمہ بجلی کے عہدیداروں کو ذمہ دار قرار دیا۔
تاہم پولیس نے انصاف کرنے کی یقین دہانی کرواتے ہوئے اس احتجاج کو ختم کروایا۔ بجلی کے محکمہ کے اگزیکٹیو انجینر مرلی کرشنا مقام واقعہ پر پہنچے اور کہا کہ وہ اعلی عہدیداروں کے علم میں اس واقعہ کو لائیں گے۔
