وادی کشمیر میں چار روز تک وقفہ وقفہ سے ہوئی شدید برفباری کے بعد زندگی مفلوج ہو کر رہ گئی تھی، جمعرات کے روز برفباری کا سلسلہ تھم گیا جس کے بعد معمولات زندگی کچھ حد تک بحال ہو گئی۔
اگرچہ انتظامیہ کی جانب سے ضلع اننت ناگ کی مختلف سڑکوں سے برف ہٹائی گئی۔ تاہم سڑکوں کے کنارے برف کے انبار جمع ہونے سے ٹریفک کی نقل و حمل متاثر ہو گئی ہے جس کے سبب ضلع اننت ناگ کے زرپارہ، بجبہاڑہ و دیگر کئی مقامات پر شدید ٹریفک جام کے مناظر دیکھے گئے۔
ٹریفک جام کے سبب عام لوگوں، خاص کر مسافروں کو عبورو مرور میں کافی دشواریوں کا سامنا ہے۔
ٹریفک جام کے سبب مسافروں کو اپنی منزل تک پہنچنے میں منٹوں کے بجائے گھنٹوں لگ رہے ہیں۔ وہیں خاص کر بیماروں کو ہسپتال لے جانے میں کافی دقتوں کا سامنا کرنا پڑتا ہے۔
اننت ناگ کے عوام نے متعلقہ حکام سے سڑکوں سے مکمل طور برف ہٹانے کا مطالبہ کیا ہے۔
