ذرا نم ہو تو یہ مٹی بڑی ذرخیز ہے ساقی

کہتے ہیں کہ زندگی جہدِ مسلسل ہے اور ایک انسان کو ہزاروں بار آزمائشوں اور امتحانات سے گذرنا پڑتا ہے۔ مگر ان آزمائشوں سے بہت کم لوگ کھرا اُتر پاتے ہیں۔

انسان کوشش اور محنت کرے تو کامیابی اس کے قدم چوم لیتی ہے۔ گذشتہ روز سیول سرویسز امتحانات 2019 کے حتمی نتائج کا اعلان کیا گیا جس میں ضلع اننت ناگ کے گیبوم کوکرناگ کے سبزار احمد گنائی نے کامیابی حاصل کی ہے۔

تحصیل ہیڈکواٹر کوکرناگ سے تقریباً 12 کلومیٹر کی دوری پر واقع گیبوم نامی گاوں جہاں کے لوگوں کو اُس وقت یہ سُن کر مسرت ہوئی جب انہوں نے سبزار احمد کی یو پی ایس سی میں کامیابی کی خبر سنی۔

سبزار احمد وادی کے ان لوگوں میں سے ہیں، جن کے والدین کسمپرسی کی زندگی گذار رہے ہیں۔ ایسے کنبے سے تعلق رکھتے ہیں، جن کے یہاں دو وقت کی روٹی بڑے ہی مشکلات کا سامنا کرنے کے بعد میسر ہوتی ہے۔

اگر چہ سبزار کی ابتدائی تعلیم گیبوم کے سرکاری پرائمری اسکول میں ہوئی، تاہم گورنمنٹ پرائمری اسکول گیبوم سے نکل کر سبزار کا داخلہ ماٹپورہ کی گورنمنٹ ہائر سکینڈری میں ہوا جہاں آٹھ سال تک سبزار کی پڑھائی جاری رہی۔

سبزار کے والدین کا کہنا ہے 'انہوں نے لوگوں کے یہاں مزدوری کر کے اپنے بیٹے کو پڑھایا ہے۔ سبزار کو بچپن سے ہی پڑھنے لکھنے کا بہت شوق تھا، ان کے پاس ایسا کوئی بھی سہارا نہیں تھا جس سے وہ اپنے بیٹے کو اعلیٰ تعلیم مہیا کرواتے'۔

والدین کے مطابق ان کے پاس جو کچھ بھی دستیاب تھا سب سبزار کی پڑھائی کے لئے وقف کیا۔ ایک جانب جہاں والدین نے اپنے بیٹے کی ضرورتوں کو پورا کرنے کے لئے دن رات کافی محنت و مشقت کی، تاکہ ان کا بیٹا زندگی میں اپنے ساتھ ساتھ اپنے والدین کا نام روشن کر سکے۔ وہیں دوسری جانب سبزار نے بھی اپنے والدین کے خواب کو شرمندہ تعبیر کرنے کے لئے کافی جدوجہد کی بالآخر سبزار نے کامیابی حاصل کی۔

سبزار کے بھائی کا کہنا ہے 'وہ سبھی لوگ مبارک باد کے مستحق ہیں جنہوں نے ان کے بھائی کو تعاون دیا، اور وقتاً فوقتاً ان کی مدد کی'۔

یو پی ایس سی امتحانات میں کامیابی پانے والے امیدواروں کے والدین کے سر فخر سے اونچے ہوئے ہیں، وہیں سماجی رابطہ کی ویب سائٹس پر بھی انہیں مبارک بادی کے پیغامات مل رہے ہیں۔