'بی جے پی رہنما پر حملہ ایک بزدلانہ حرکت'

بی جے پی جموں و کشمیر ونگ کے نائب صدر صوفی یوسف نے بی جے پی رہنما کے گھر پر ہوئے حملہ کی مذمت کی۔

بھارتیہ جنتا پارٹی کے ریاستی نائب صدر صوفی یوسف نے ضلع اننت ناگ کے ویری ناگ علاقہ میں نا معلوم بندوق برداروں کی جانب سے بی جے پی کے سینئر رہنما پنکا ملک کے گھر پر گولیاں چلا کر ہراساں کرنے کی پُر زور الفاظ میں مذمت کی۔

انہوں نے کہا کہ یہ ایک بزدلانہ حرکت ہے اور اس سے پارٹی سے جڑے افراد کے حوصلے پست نہیں ہونگے۔ صوفی نے ایس ایس پی اننت ناگ سے اپیل کرتے ہوئے معاملہ کی غیر جانبدارانہ تحقیقات کا مطالبہ کیا۔

واضح رہے کہ جنوبی کشمیر کے ضلع اننت ناگ کے ویری ناگ علاقہ میں گزشتہ شب کچھ نامعلوم بندوق برداروں نے بھارتیہ جنتا پارٹی کے سینئر رہنما پینکا ملک کے گھر پر گولیاں چلائیں۔
حالانکہ فائرنگ کی وجہ سے کوئی بھی جانی نقصان نہیں ہوا۔ واقعہ کے بعد علاقے میں خوف و دہشت کا ماحول پیدا ہو گیا ہے۔

گولیوں کی وجہ سے مکان کی کھڑکیوں کو معمولی نقصان پہنچا ہے۔ وہیں اس معاملے میں پولیس اسٹیشن ڈورو میں ایف آئی آر درج کی گئی اور تحقیقات شروع کر دی ہے۔ حادثہ کے وقت پینکا ملک گھر میں موجود نہیں تھے۔