ضلع اننت ناگ کے ڈورو اور ویری ناگ علاقوں میں عوام نے پینے کے پانی کی قلت پر احتجاج کرتے ہوئے محکمہ جل شکتی کے خلاف نعرے بازی کی۔
نمائندے کے مطابق ڈورو کے برگام اور ویری ناگ کے گنی گنڈ کے لوگوں نے سڑکوں پر اتر کر محکمہ جل شکتی کے خلاف احتجاج کیا۔
ڈورو اننت ناگ کے برگام علاقے سے تعلق رکھنے والے ایک مقامی باشندے غلام حسن لون نے ای ٹی وی بھارت کو بتایا: ’’ہمیں پانی کی دستیابی سے محروم کیا جا رہا ہے اور بار بار درخواست دینے اور گزارشات کے باوجود متعلقہ محکمہ اور انتظامیہ ہماری مشکلات کو حل کرنے کی زحمت گوارا نہیں کر رہے۔‘‘
احتجاج کر رہے لوگوں نے بتایا کہ پینے کا پانی لانے کے لیے انہیں تقریبا ایک کلومیٹر کا فاصلہ طے کرنا پڑتا ہے، انہوں نے کہا: ’’بعض اوقات ہم تالاب اور ٹیوب ویل کا پانی استعمال کرنے پر مجبور ہو جاتے ہیں جس سے ہماری صحت پر برے اثرات مرتب ہو رہے ہیں۔‘‘
ویری ناگ کے ملک پورہ کی عوام نے بھی محکمہ جل شکتی کے خلاف احتجاج کرتے ہوئے کہا ’’ویری ناگ میں دنیا کا سب سے بڑا اور صاف و شفاف چشمہ ہونے کے با وجود محکمہ جل شکتی یہاں کی عوام کو پانی فراہم کرنے میں ناکام ثابت ہو رہا ہے۔‘‘
اس حوالے سے ای ٹی وی بھارت نے محکمہ جل شکتی کے اے ای ای (AEE) سب ڈویژن ویری ناگ سے رابطہ کرنے کہ کوشش کی تاہم انکے ساتھ رابطہ قائم نہ ہو سکا۔
