جموں و کشمیر ان ایپلائڈ فزیکل اینڈ سپورٹس ایسوسی ایشن کے بینر تلے بے روزگار نوجوانوں نے ضلع اننت ناگ کے سپورٹس اسٹیڈیم میں اپنے مطالبات کو پورا کرنے کےلیے احتجاج کیا۔
نوجوانوں کا کہنا ہے کہ 'فزیکل ٹیچرس کی بھرتی عمل میں لانے کے لئے رہبر کھیل اسکیم کو متعارف کیا گیا تھا، تاکہ مذکورہ شعبہ میں ڈگری یافتہ نوجوانوں کو بہ آسانی روزگار فراہم کرنے کا راستہ ہموار ہو جائے۔ تاہم حکومت نے گزشتہ کئی برس قبل پہلے مرحلہ کے تحت فزیکل ٹیچرس کی بھرتی عمل میں لائی گئی، لیکن دوسرے مرحلہ کے تحت سات ہزار دو سو گیارہ خالی پڑی اسامیوں کو پورا کرنے کے اقدامات نہیں کیے جا رہے ہیں۔ اس کی وجہ سے مذکورہ شعبہ میں ڈگری حاصل کرنے والے ہزاروں بے روزگار نوجوانوں کا مستقبل داؤں پر لگ گیا ہے۔ انہوں نے کہا کہ سینکڑوں بے روزگار نوجوان ایسے ہیں جو عمر کی بالائی حد کے قریب ہیں'۔
انہوں نے کہا کہ فزیکل ایجوکیشن میں ڈگری یافتہ نوجوان اصولوں کے مطابق کسی دوسری سرکاری نوکری کے لئے درخواست بھی نہیں دے سکتے۔ مظاہرین نے ایل جی انتظامیہ سے معاملہ کی جانب توجہ دےکر مسئلہ کا ازالہ کرنے کا پُر زور مطالبہ کیا۔
