جنوبی کشمیر کے ضلع اننت ناگ میں علاقہ ڈورو کے سہہ پورہ علاقے میں عوام نے لگاتار دوسرے روز محکمہ جل شکتی کے خلاف احتجاج کرتے ہوئے مقامی آبادی کو پینے کا صاف پانی مہیا کرنے کی مانگ کی۔
ای ٹی وی بھارت سے بات کرتے ہوئے احتجاجیوں نے کہا کہ’’ہمیں پانی کی دستیابی سے محروم کیا جا رہا ہے اور بار بار درخواست دینے اور گزارش کے باوجود متعلقہ محکمہ اور انتظامیہ ہماری مشکلات کو حل کرنے کی زحمت گوارا نہیں کر رہا۔‘‘
احتجاج کر رہے لوگوں نے بتایا کہ پینے کا پانی لانے کے لیے انہیں تقریبا ایک کلومیٹر کا فاصلہ طے کرنا پڑتا ہے، انہوں نے کہا: ’’بعض اوقات ہم تالاب اور ٹیوب ویل کا پانی استعمال کرنے پر مجبور ہو جاتے ہیں جس سے ہماری صحت پر برے اثرات مرتب ہو رہے ہیں۔‘‘
احتجاجیوں کا کہنا تھا کہ انہیں مجبور ہو کر سڑکوں پر اتر کر احتجاج کرنا پڑ رہا ہے کیونکہ بار ہا شکایات و گزاراشات کے باوجود انتظامیہ انہیں پینے کا صاف پانی مہیا کرنے سے قاصر ہو چکی ہے۔
