اننت ناگ: ماں اور بیٹے کی پراسرار موت

ضلع اننت ناگ کے کوکرناگ علاقے میں ایک خاتون اور اس کے کمسن بیٹے کی لاش ان کے ہی گھر میں پائے جانے سے گاؤں میں افراتفری کا ماحول پیدا ہوگیا، گاؤں کے لوگوں نے تحقیقات کا مطالبہ کیا ہے۔

جنوبی کشمیر کے ضلع اننت ناگ کے کوکرناگ علاقے میں ہفتے کی صبح اس وقت افراتفری کا ماحول پیدا ہوگیا، جب ایک خاتون اور اس کے کمسن بیٹے کو اپنے ہی گھر میں مردہ پایا گیا۔

گاؤں اور رشتہ داروں نے جب ماں اور بیٹے کو فوری طور پر نزدیکی ہسپتال میں لیکر گئے تو وہاں ڈاکٹروں نے دونوں کو مردہ قرار دے دیا، جسکے بعد دونوں لاشوں کو جی ایم سی اننت ناگ منتقل کیا گیا اور پوسٹ مارٹم کے بعد لاشوں کو لواحقین کے سپرد کیا گیا۔

پولیس ذرائع کے مطابق دونوں کی شناخت 23 سالہ عشرت اور اس کے بیٹے 2 سالہ مصعیب کے طور پر ہوئی ہے، پولیس نے اس ضمن میں معاملہ درج کر کے مزید تحقیقات شروع کر دی ہے، اور ابتدائی جانچ سے معلوم ہوا ہے کہ ان دونوں کی موت دم گھٹنے کی وجہ سے ہوئی ہے، تاہم لوگوں نے اس حوالے سے تحقیقات کا مطالبہ کیا ہے۔