نوے کی دہائی میں وادی میں نامساعد حالات کی وجہ سے ہزاروں پنڈتوں نے وادی سے ہجرت کی جو ملک کی مختلف ریاستوں میں اب رہتے ہیں لیکن تب سے لے کر آج تک بہت سارے کشمیری پنڈتوں کی اراضی ویران پڑی ہے۔ ایسے میں ناگ بل کھرم میں کشمیری پنڈتوں کی زمین گندگی اور غلاظت کے ڈھیر میں تبدیل ہو گئی ہے۔
مقامی لوگوں کا کہنا ہے کہ فینسنگ نہ ہونے کی وجہ سے دوسرے علاقہ جات کے لوگ اس زمین میں کوڑا کرکٹ اور گوبر ڈال دیتے ہیں جس سے اس زمین کے قریبی رہائشیوں کا جینا محال ہو گیا ہے۔
مقامی لوگوں کا کہنا ہے کہ جہاں کووڈ 19 وبا نے پوری دنیا کو اثر انداز کیا ہے اور صفائی ستھرائی و دیگر احتیاطی تدابیر کو سنجیدگی کے ساتھ اپنایا جاتا ہے۔ وہیں اگر ان کے علاقہ کی بات کریں تو یہاں گندگی اور غلاظت کے ڈھیر نظر آ رہے ہیں جس کی وجہ سے وہاں پر کافی بدبو پھیل گئی ہے جو بیماریوں کا سبب بن سکتی ہے۔
لوگوں کا کہنا ہے کہ کوڑا جمع ہونے کے تعلق سے اگرچہ کئی بار متعلقہ حکام کو بتایا گيا لیکن انہوں نے اس جانب کوئی توجہ نہیں دی۔ لوگوں نے انتظامیہ سے مطالبہ کیا کہ اس زمین کی فینسنگ (دیور بندی) عمل میں لائی جائے، تاکہ کوئی بھی اس جگہ کو کوڑا کرکٹ کے استعمال میں نہ لائے۔
اس سلسلے میں جب نمائندے نے بلاک ڈیولپمنٹ آفیسر عرشی رسول سے بات کی، تو انہوں نے اس بات کا فوراً نوٹس لیتے ہوئے محکمہ کے ملازمین کو مذکورہ جگہ پر صفائی کا کام انجام دینے کے لئے حکمنامہ صادر کیا۔
