جنوبی کشمیر کے ضلع اننت ناگ کے بجبہاڑہ کے سامبد نوشہرہ میں ایک المناک حادثہ میں کنکریٹ مکان کی سلیب گرنے سے مزدور ہلاک جبکہ دوسرا شدید زخمی ہوگیا۔
تفصیلات کے مطابق سامبد نوشہرہ میں اس وقت سنسنی پھیل گئی جب محمد اسلم بجاد کے گھر میں دو مزدور مکان کی شٹرنگ کھول رہے تھے۔ اسی دوران اچانک سے سلیب گرنے کی وجہ سے دونوں مزدور اس کی زد میں آگئے۔
اگرچہ مزدوروں کو فوری طور پر علاج ومعالجہ کی خاطر نزدیکی ہسپتال منتقل کیا گیا۔ تاہم ڈاکٹروں نے وہاں پر سامبد نوشہرہ سے تعلق رکھنے والے جنید مندد نامی شخص کو مردہ قرار دیا۔ جبکہ نوشہرہ کے ہی شبیر احمد نینگرو کی حالت مستحکم بتائی جا رہی ہے۔ اُسے گورنمنٹ میڈیکل کالج اننت ناگ منتقل کیا گیا ہے، جہاں آخری اطلاع ملنے تک زخمی شخص کا علاج جاری ہے۔
