جنوبی کشمیر میں ضلع اننت ناگ کے ویری ناگ علاقے میں محکمہ جل شکتی میں یومیہ اجرت پر کام کر رہے عارضی ملازمین نے تنخواہوں کی واگزاری، محکمہ میں مستقلی اور دیگر مطالبات کو لیکر احتجاج کیا۔
احتجاج میں شامل عارضی ملازمین نے لیفٹینٹ گورنر انتظامیہ سے انکے دیرینہ مطالبات کو پورا کرنے کی مانگ کرتے ہوئے نعرے بازی کی۔
احتجاجی عارضی ملازمین کا کہنا تھا کہ وہ برسوں سے معمولی اجرت پر تندہی سے اپنے فرائض انجام دے رہے ہیں تاہم اسکے باوجود مہینوں سے انکی تنخواہیں واگزار نہیں کی جا رہی ہیں۔
انہوں نے دیگر مرکزی زیر انتظام خطوں (یونین ٹیریٹریز) کی طرح کشمیر میں بھی ’’منیمم ویجز ایکٹ‘‘ (Minimum Wages Act) لاگو کرنے کی بھی مانگ کی۔ عارضی ملازمین نے نوکریوں کی مستقلی کے حوالے سے بھی سرکار سے واضح پالیسی مرتب کرنے کی مانگ کی۔
احتجاجی عارضی ملازمین کے مطابق ’’اگر سرکار اس حوالے سے جلد کوئی فیصلہ نہیں لیتی، تو ہم مجبور ہو کر اپنے اہل و عیال کے ساتھ احتجاج کرنے پر مجبور ہو جائیں گے جس کی تمام تر ذمہ داری انتظامیہ پر عائد ہوگی۔‘‘
