ضلع اننت ناگ کے سپورٹس اسٹیڈیم میں محکمہ وائلڈ لائف سے وابستہ عارضی ملازمین نے اپنی مختلف مانگوں کو لے کر احتجاجی مظاہرہ کیا۔
عارضی ملازمین جموں کشمیر وائلڈ لائف یونائٹڈ فرنٹ ایسوسی ایشن کے بینر تلے احتجاج کر رہے تھے۔
محکمہ وائلڈ لائف کے عارضی ملازمین کا احتجاج
عارضی ملازمین کی مانگ ہے کہ ان کی بند پڑی تنخواہوں کو واگزار کیا جائے اور نوکریوں کو مستقل کیا جائے۔ ان کا کہنا ہے کہ کئی بار اعلیٰ حکام کی نوٹس میں لانے کے باوجود ان کی مانگوں کو پورا نہیں کیا گیا۔
یومیہ اجرت پر کام کر رہے عارضی ملازمین نے الزام عائد کرتے ہوئے کہا کہ چیف وارڈن کی جانب سے مذکورہ ملازمین کی فائل کو سکریٹریٹ روانہ نہیں کیا جا رہا ہے۔
انہوں نے لیفٹینٹ گورنر انتظامیہ سے ملازمین کی تنخواہیں واگزار کرنے اور نوکریوں کو مستقل کرنے کا مطالبہ کیا، بصورت دیگر وہ احتجاج میں شدت لائیں گے۔
