اننت ناگ: اتوار کے روز پلوامہ میں نامعلوم مسلح افراد نے ایک کشمیری پنڈت کو گولی مار کر ہلاک کردیا جس کے خلاف اننت ناگ میونسپل کونسل کے صدر ہلال احمد شاہ نے کونسل کے ملازمین ، سول سوسائٹی اور ٹریڈرس ایسوسی ایشن کے ہمراہ مہندی کدل سے لال چوک تک ایک کینڈل مارچ نکالا۔ کینڈل مارچ میں اننت قصبہ سے وابستہ خواتین نے بھی شرکت کی اور اس حملے کی پرزور الفاظ میں مذمت کی۔ مظاہرین نے مقتول کو خراج عقیدت پیش کیا۔ یہ کینڈل مارچ مہندی کدل اننت ناگ سے شروع ہوا اور لال چوک میں اختتام پذیر ہوا۔
- یہ بھی پڑھیں: Awantipora Encounter مہلوک عسکریت پسند کشمیری پنڈت سنجے شرما کی ہلاکت میں ملوث تھا، وجے کمار
کینڈل مارچ میں شامل میونسپل کونسل اننت ناگ کے صدر ہلال احمد شاہ ای ٹی وی بھارت سے بات کرتے ہوئے کہا کہ اس حملہ کی جتنی بھی مذمت کی جائے وہ کم ہے۔ انہوں نے کہا کہ اس طرح کے حملوں سے کشمیر میں ہندو مسلم بھائی چارے کو نقصان پہنچانے کی کوشش کی جارہی ہیں جس کی ہم مخالفت کرتے ہیں۔ انہوں نے مزید کہا کہ وہ کشمیری پنڈتوں کے ساتھ ہیں۔ اس دکھ کی گھڑی میں ان کے ساتھ برابر شامل ہیں اور یہاں کی مسلم برادری کے تمام لوگ ان کی مدد کے لیے پیش پیش رہیں گے۔ تاکہ یہاں قائم ہندو مسلم سکھ بھائی چارہ کو کوئی ٹھیس نہ پہنچے۔ واضح رہے کہ پلوامہ کے اچھن علاقہ میں نامعلوم مسلح افراد نے اتوار کے روز کشمیر پنڈت سنجے کمار شرما کو گھر کے نزدیک گولی مار کر ہلاک کر دیا تھا۔ سنجے کمار شرما ایک نجی بینک میں سکیورٹی گارڈ تھے۔
