ضلع اننت ناگ کے گانجی واڑہ پُشو محلہ میں اسٹریٹ لائٹس غیر فعال ہونے سے مقامی آبادی کو مشکلات کا سامنا کرنا پڑتا ہے۔
لوگوں کا کہنا ہے کہ اسٹریٹ لائٹس خراب ہونے کے سبب اندھیرا ہونے کے بعد باہر نکلنا مشکل ہو جاتا ہے۔ انہوں نے کہا: ’’اندھیرے میں نہ صرف کتوں کے کاٹنے کا خوف رہتا ہے بلکہ مارکیٹ میں چوری ہونے کا بھی خدشہ لاحق رہتا ہے۔‘‘
انکا مزید کہنا تھا کہ عوام کو مسجد تک جانے میں بھی روزانہ دقتوں کا سامنا کرنا پڑتا ہے۔ وہیں انہوں نے مزید کہا کہ ’’اندھیرے کا فائدہ اٹھاتے ہوئے گلی کوچوں میں منشیات کے عادی نوجوان گھومتے رہتے ہیں۔‘‘
ای ٹی وی بھارت کے ساتھ بات کرتے ہوئے مقامی باشندوں کا کہنا ہے کہ انہوں نے محکمہ میونسپلٹی کو کئی بار اس مسئلہ سے آگاہ کیا، تاہم اس کے باوجود متعلقہ محکمہ نے اسٹریٹ لائٹس کو ٹھیک کرنے کی زحمت گوارا نہیں کی۔
اس ضمن میں مقامی آبادی نے متعلقہ محکمہ سے لائٹس کی جلد سے جلد مرمت کرنے کا پر زور مطالبہ کیا ہے۔
