ٹاپ سیڈ جوکووچ نے مینز سنگلز کے سیمی فائنل مقابلے میں عالمی نمبر تین ٹینس کھلاڑی جرمنی کے الیگزینڈر زویریو کو جبکہ سیکنڈ سیڈ یافتہ میدویدیف عالمی نمبر 15 کینیڈا کے فیلکس آگر الیاسمے کو شکست دے کر سال کے آخری گرینڈ سلیم میں یو ایس اوپن کے فائنل میں پہنچے ہیں۔
جوکووچ فائنل مقابلے میں میدویدیف کے خلاف جیت سے نئی تاریخ رقم کریں گے۔ یہ جیت انہیں ایک سیزن میں چار گرینڈ سلیم ٹائٹل جیتنے والا کھلاڑی بنا دے گی۔ یہ ایسا کارنامہ ہوگا جو مینز ٹینس میں نصف صدی سے زیادہ عرصے تک کسی نے حاصل نہیں کیا۔
اس سے قبل آسٹریلیائی ٹینس کھلاڑی راڈ لیور نے 1969 کے سیزن میں چاروں گرینڈ سلیم ٹائٹل جیتے تھے۔
جوکووچ نے جہاں اپنے حریف الیگزینڈر زویریو کو پانچ سیٹوں کے میچ میں 4-6، 6-2، 6-4، 4-6، 6-2 سے شکست دی، وہیں میدویدیف نے فیلکس آوگر الیاسمے کو 6-4، 7-5، 6-2 سے ہرایا۔
پہلے سیٹ میں زویریو سے پیچھے رہنے کے بعد جوکووچ نے شاندار واپسی کی اور اگلے دو سیٹ اپنے نام کیے۔ تیسرے سیٹ میں 5-4 کے اسکور پر جوکووچ نے 53 گیندوں کی ریلی کھیلی اور آخر میں ایک پوائنٹ حاصل کرکے زویریو کو 6-4 سے ہرایا۔
یہاں سے جوکووچ کو فائنل میں پہنچنے کے لیے صرف ایک سیٹ جیتنا ضروری تھا لیکن زویریو نے چوتھے سیٹ میں انہیں 6-4 سے ہرا کر سب کو حیران کردیا حالانکہ 6-2 سے آخری سیٹ پر قبضہ کرکے جوکووچ فائنل میں پہنچے۔ دوسری جانب میدویدیف نے سیدھے سیٹوں میں جیت حاصل کی۔
