نئی دہلی: چھ بار کی ایشیائی چمپئن شپ میں تمغہ جیتنے والے شیوا تھاپا اور 2019 ایشین چمپئن شپ کے چاندی کا تمغہ جیتنے والے دیپک بھوریا 30 اپریل سے 14 مئی تک ازبکستان کے تاشقند میں ہونے والی آئندہ آئی بی اے مینز ورلڈ باکسنگ چمپئن شپ میں ہندوستانی ٹیم کی قیادت کریں گے۔ 2015 کی عالمی چمپئن شپ میں کانسہ کا تمغہ جیتنے والے شیوا نے 63.5 کلوگرام زمرے میں ملک کی نمائندگی کرتے ہوئے اپنے نام میں ایک اور تمغہ شامل کرنا چاہیں گے۔ حالیہ دنوں میں تیزی سے ابھرے دیپک 51 کلوگرام فلائی ویٹ زمرہ میں دعوے داری پیش کریں گے۔
دیپک نے 2021 میں اسٹرینڈجا میموریل ٹورنامنٹ میں 2016 کے ریو اولمپک گولڈ میڈلسٹ اور 2019 کے عالمی چیمپیئن ازبکستان کے شاخوبدین زویروف کو شکست دے کر سب کی توجہ اپنی طرف مبذول کی تھی۔ ٹیم کے اعلان پر بات کرتے ہوئے، باکسنگ فیڈریشن آف انڈیا (بی ایف آئی) کے صدر اجے سنگھ نے کہا، "مردوں کی ٹیم بہت محنت کر رہی ہے اور میں ان کے لیے نیک خواہشات کا اظہار کرتا ہوں۔ مجھے یقین ہے کہ ان میں سے ہر ایک ملک کا نام روشن کرے گا۔ ہم نے حال ہی میں ہندوستانی خواتین باکسروں کو دہلی ورلڈ چیمپئن شپ میں اپنی بہترین کارکردگی کا مظاہرہ کرتے ہوئے دیکھا ہے اور مجھے امید ہے کہ ہمارے لڑکے آئی بی اے مردوں کی عالمی باکسنگ چیمپئن شپ میں ایک بار پھر ہمیں فخر محسوس کرائیں گے۔
