حال ہی میں مختلف دوڑ کے مقابلوں میں چھ سے زائد طلائی تمغے جیتنے والی بھارت کی مایہ ناز اتھیلیٹ دوتی چند نے عالمی چیمپیئن شپ کی تیاریوں کے درمیان ٹویٹ کر کے سیاست میں قدم رکھنے کا اشارہ دیا ہے۔
دوتی چند نے اپنے ٹویٹ میں کہا کہ 'میں بچپن سے ہی سیاست میں آنا چاہتی تھی، میرا خاندان ہمیشہ سے ہی زمینی سطح کی سیاست سے منسلک رہا ہے جبکہ میری ماں گاؤں کی سرپنچ بھی رہ چکی ہیں۔'
دوتی چند کے ٹویٹ کے بعد ان کا سیاست میں قدم رکھنے کے بارے میں چہ مگوئیاں شروع ہوگئیں ہیں، لیکن انہوں نے اس بات کا واضح اشارہ نہیں دیا کہ وہ کون سی سیاسی جماعت سے وابستہ ہوں گی لیکن لوگ اڑیسہ کی برسراقتدار جماعت بیجو جنتا دل سے وابستہ ہونے کا قیاس لگا رہے ہیں کیوں کہ دوتی چند نے لوک سبھا انتخابات میں بی جے ڈی کے امیدوار کے لیے تشہیری مہم میں حصہ لیا تھا۔
دوسری جانب دوتی چند کے مداحوں نے ری ٹویٹ کرکے انہیں سیاست میں آنے کی بجائے اپنے کھیل کا پر توجہ دینے کی بات کی۔
واضح رہے کہ دوتی چند 27 ستمبر سے دوحہ میں شروع ہونے والی عالمی چیمپیئن شپ کے 100 میٹر ریس کے لیے تیاریوں میں مصروف ہیں۔
اڑیسہ سے تعلق رکھنے والی ملک کی اس مایہ ناز رنر نے ماہ جولائی میں اٹلی کے نپولی میں منعقد ہونے والی 100 میٹر کی ریس کو 11 منٹ 32 سیکنڈ میں مکمل کرکے طلائی تمغہ حاصل کرنے والی پہلی بھارتی کھلاڑی ہونے کا اعزاز حاصل کیا تھا۔
