حیدرآباد: ون ڈے ورلڈ کپ میں 15 اکتوبر کو احمد آباد میں ہونے والے پاک بھارت میچ کی تاریخ تبدیل کر دی گئی ہے۔ یہ میچ اب 14 اکتوبر کو کھیلا جائے گا۔پاکستان کرکٹ بورڈ (پی سی بی) نے تاریخ تبدیل کرنے پر رضامندی ظاہر کر دی ہے۔
پاکستان کے سری لنکا کے خلاف میچ کی تاریخ بھی تبدیل کر دی گئی ہے۔ یہ میچ 12 اکتوبر کو کھیلا جانا تھا۔ اب یہ میچ 10 اکتوبر کو ہوگا۔ اس تبدیلی کی وجہ سے پاکستان کو بھارت کے خلاف میچ سے پہلے 3 دن کا وقفہ مل جائے گا۔
ون ڈے ورلڈ کپ 5 اکتوبر سے کھیلا جائے گا اور انٹرنیشنل کرکٹ کونسل (آئی سی سی) نے جون کے آخر میں اس کا شیڈول جاری کیا تھا۔ دوسری ٹیموں کے کچھ میچوں کے اوقات میں بھی تبدیلی کی جا سکتی ہے۔ آئی سی سی نیا شیڈول جلد جاری کرے گا۔
سیکیورٹی ایجنسیوں نے احمد آباد میں 15 اکتوبر کو ہونے والے میچ پر تشویش کا اظہار کیا تھا۔ ایجنسیوں نے کہا تھا کہ یہ تاریخ نوراتری کا پہلا دن ہوگی۔ ایسی صورت حال میں مناسب سیکورٹی فراہم کرنے میں مسئلہ ہو سکتا ہے۔ اس کے بعد آئی سی سی اور بی سی سی آئی نے پاکستان بورڈ سے رابطہ کیا اور 2 گروپ میچوں کی تاریخ تبدیل کرنے کی بات کی۔
یہ بھی پڑھیں: آخری ون ڈے میچ میں ویسٹ انڈیز کو شکست، بھارت نے سیریز جیتی
ہندوستانی ٹیم ورلڈ کپ 2023 میں اپنی مہم کا آغاز آسٹریلیا کے خلاف میچ سے کرے گی۔ بھارت اور آسٹریلیا کے درمیان یہ میچ 8 اکتوبر کو کھیلا جائے گا۔ دونوں ٹیمیں 8 اکتوبر کو چنئی میں آمنے سامنے ہوں گی۔
